DJOEQA DAPET KEMADJOEAN.
Lantaran doedoek dekat bagitoe, maka maoe atawa tida Liang-oen dan pengiringnja itoe gadis djadi berkenalan.
„Akoe poenja nama Tjin-tek, dan ini akoe poenja soedara, Seng-nio. Akoe kira kaoe berdoea soeda pernah bertemoe.”
„Akoe Liang-hoen, Thio Liang-hoen,” djawab itoe orang moeda, „tentang berkenalan dengen kaoe poenja soedara, engko Tjin-tek, baroe sadja terdjadi, di Pasar Gambir, sedeng lebih doeloe akoe pernah dateng di kaoe poenja toko satoe doea kalih boeat beli sadikit barang kaperloean.”
„O, bagitoe,” kata Tjin-tek, „dan ini hari akoe berkenalan dengen kaoe.”
„Satoe kahormatan boeat akoe, engko Tjin-tek,” kata Liang-hoen.
„Boeat akoe djoega, bolehkah akoe menanja di mana kaoe tinggal ?”
„Di Krekot, engko Tjin-tek, tapi kebanjakan akoe tida ada di roemah. Saban tiga boelan sakalih baroelah akoe berada di Betawie dan dalem itoe tiga boelan selamanja akoe moesti djalan koeliling, sebab akoe bekerdja sebagi verkooper dari toko . . ., tapi boeat bagian loear kota Betawie boeat barang-barang tjita dan prabot toelis.”
„Satoe pakerdja’an jang bagoes, engko Liang-hoen."
25
