V.
TIDA DJADI LEBI TERANG.
Kombali Kim-djin bertemoe dengen itoe gadis, dan sekarang dalem bangsal gambar idoep, atawa lebi betoel di depan itoe gedong. Saperti djoega di waktoe hendak menonton Pasar Gambir ia tawarken boeat toeloeng beliken kartjis, tawaran mana ditrima, tapi itoe gadis jang dalem waktoe paling blakang menarik ia poenja perhatian berkata :
„Tapi ini sakalih kaoe moesti idzinken akoe jang bajarin kaoe menonton dengen bagitoe akoe poenja oetang djadi loenas!”
Kim-djin poen menolak, dan bebrapa lamanja marika saling mendesak, sampe achirnja kadengaran lontjeng listrik berboenji, satoe tanda jang pertoendjoekan bakal lekas dimoelai. Kim-djin terpaksa trima djoega oewang dari itoe gadis, tapi di waktoe kasi kombaliannja ia tambahken djoemblah jang ia sendiri moesti bajar, hinggah dengen bagitoe masing-masing bajar sendiri harganja marika poenja tempat doedoek.
Kabetoelan itoe malem penonton tida banjak. Itoe gadis diapit di sablah kiri oleh iboenja dan di sablah kanan oleh Kim-djin.
30
