’HIDOEP’
51
Terhadep pada seorang jang soeka goejonan sebagi Tjiap, siapa sadja lantas soeka menggoda kepadanja.
Satoe sore dari hari minggoe, Tiong-gie bangoen dari tidoer siang, telah nampak Tjiap lagi kedoek tanah di pekarangan depan, boeat tanem bibit kembang Dahlia jang baroe di dapet. Tionggie laloe samperin ia.
„Hei, ini bibit kembang kaoe dapet tjoeri dari mana?” tanja Tiong-gie.
„Akoe boekan pentjoeri! Akoe dapet ini bibit kembang boekan dari mentjoeri!” saoetnja Tjiap.
„Dan dari mana?”
„Dari Karta......... Karta kasih padakoe.”
„Dari mana Karta dapet itoe?”
„Boleh djadi ia dapet tjoeri dari gedong administrateur......”
„Nah, sekarang kaoe ngakoeh, kaoe tida tjoeri, tapi djadi toekang tadah, dan toekang tadah hoekoemannja lebih berat..........!”
Tjiap tertawa dan egosken paras moekanja, kemoedian teroesken menggali itoe tanah.
„Tjiap, mari akoe jang menggali dan kaoe jang tanem,” kemoedian Tiong-gie berkata dan minta itoe penggali.
„Tida; besok akoe jang petik, dan sekarang akoe jang tanem.......” Tjiap membantah.
