- 27 -
Orang jang niat melakoekan permandian dengan sorot matahari, moesti mentjari satoe tempat, dimana ia boleh tidoer dengan badannja antero didjemoer pada sorotnja matahari, tetapi kepalanja dan moekanja moesti ditoetoepi dengan kain atau toedoeng, ada lebih baik lagi kaloe ditoetoep djoega dengan daoen pisang, soepaja moeka dan kepala itoe djangan terkena hawa panas.
Pakeannja moesti tipis, sedang kakinja haroes bertelandjang. Djikaloe orang perempoean, tida boleh pake corset, badjoe kotang atau kemben, jang melibat pada badan dan dadanja.
Lamanja melakoekan permandian ini dari satoe sampe doea djam, baiknja diwaktoe pagi antara djam 9 dan 10, sedang matahari beloem begitoe panas. Djikaloe jang melakoekan dapat kepala poesing atau sakit kepala, temponja berdjemoer itoe boleh dikoerangin.
Perloenja permandian ini ada boeat mengeloearkan keringat, sebab sorot matahari itoe bisa masoek diantero lobang koelit, boeat bikin tjair minjak-minjak atau gemoek jang melekat disitoe.
Boeat orang jang badannja koerang koeat dibikin djalan-djalan pada waktoe sesoedahnja melakoekan permandian rendam peroet dan kemaloean, sorot matahari ini ada paling baik boeat bikin angat kombali toeboehnja, karena selainnja membikin kembang lobang koelit, poen ada memberi faedah pada zenuw soepaja bekerdja sebagimana moestinja.
Permandian ini boleh djoega dilakoekan pada sebeloemnja mandi dengan rendaman, tetapi paling baik dilakoekan kemoedian, sebab ada mengandoeng lebih banjak faedah.
VI.
Makanan dan minoeman jang paling baik boeat
toeboeh manoesia.
Perloe sekali boeat orang jang melakoekan permandian.
Menoeroet pendapatannja toean Kuhne, orang jang ingin hidoeja selamat dan sehat, tida perloe moesti makan daging dan lain-lain jang terdapat dari binatang, dan tida perloe djoega makanan itoe ditjampoeri boemboe-boemboe jang boekan moestinja. Lebih tegas: paling baik orang moesti mendjalani vegetarisme.
