— 68 —
Tapi maski djoega njonja Guillin soeda kasih liat jang ia tida menaro katjoerigaän lagi atas dirinja Landru, tapi toch ini pendjahat tetap pikir, bahoea datengnja itoe pertanjaän ada mendjadi satoe alamat jang tiada baik boeat dirinja. Kenapa ia ada berpikir bagitoe, jalah lantaran ia kwatir kaloe-kaloe ini njonja aken omongken itoe hal pada laen orang, maski poen omongan itoe ada satoe poedjian boeat dirinja, tapi itoe kamar resia. . . . . . . . . tetap tida boleh dikatahoei oleh laen orang salaen dirinja sendiri.
Pada itoe saät djoega Landru lantas ambil poetoesan boeat abisken djiwanja ini njonja djanda toewa, maka dengen mesem jang amat manis, ia laloe berkata:
„Harganja segala matjem barang-barang di Parijs tingginja sekarang tida bisa dikata lagi. Berhoeboeng dengen kitaorang poenja berangkat, maka akoe maoe tanja kaoe poenja pikiran, djantoeng hatikoe, apatah tida baek djikaloe kaoe djoeal sadja sakalian barang-barangmoe jang tida perloe dibawa dalem pelajaran? Salaennja kita aken terbebas dari penjewa'an vracht kapal, disini poen kita bisa dapet banjak oentoeng lantaran naeknja harga barang-barang. Kabetoelan sekali akoe ada kenal satoe soedagar jang djoedjoer, maka djikaloe kaoe ada pertjaja, biarlah akoe serahken padanja boeat toeloeng djoealken barang-barang kaoe".
„Betoel sekali Henri!" djawabnja njonja Guillin jang tida sekali merasa dirinja lagi ditipoe.
„Djadi kaoe moefakat dengen nasehatkoe?" tanja lagi Landru boeat dapet kapastian jang lebih tetap. „Marilah kita masoek ka dalem, sebab kaoe moesti bikin satoe soerat kwasa, soepaja si toekang djoeal boleh trima barang-barang dengen mengarti asal-oesoelnja".
Njonja Guillin toeroeti sadja kahendakannja Landru, iaorang laloe masoek ka kamar toelis, dan Landru toelis sendiri itoe soerat kwasa, laloe diteeken oleh njonja Guillin. Dalem soerat kwasa itoe ada menerangken jang Landru dibriken samoea kakwasaän boeat djoeal barang-barang pakean, perabotan roemah, mas inten dan soerat-soerat, aandeel jang ada tersimpen di Bank atas namanja njonja Guillin.
