— 115 —
njang maski djiwa sang anak bisa di toeloeng, anak itoe nanti moesti mendjadi pintjang.
HOK OEN pintjang! HOK OEN moesti doedoek en reba sadja seoemoer idoepnja! Ah ENG TJAIJ soenggoe tida abis mengarti; ia tida maoe pertjaia keterangannja Dokter en mendjadi tida sabaran.
„Demi Allah, bilangin toch apa njang sebenernja! Apatah boekannja kan maoe takoetken akoe sadja njang anak koe ― O itoe anak, njang sebegitoe lama akoe kenal en seoemoer idoepnja belon perna doedoek diam ― sekarang slamanja tida bisa lelarian lagi! Ah, bilang toch dengen. sebetoelnja!”
„Slamanja, toean LIM! Slamanja tida bisa lelarian lagi.”
Masi sadja ia tida maoe pertjaia, masi sadja ia tida abis mengarti.
la berbalik en pergi kloear, di mana brengkali ia bisa dapet pikiran boeat bisa mengarti en pertjaia itoe Dokter. „Slamanja angotanja tida bisa di goenaken ?!” la taoe, njang ia moesti mengarti itoe seperti koepingnja bisa mendenger sesoeatoe perkatakan, tetapi toch ia tjoema rasahken seoepama angin sadja njang menioep zonder mempoenjai arti.
„Slamanja anggotanja tida bisa di goenaken!” mengoelang ENG TJAIJ lagi en lagi. En itoe artinja ― ia maoe tjoba menerangken dirinja ― itoe artinja ― njang anaknja, O anaknja njang tida kenal tjape bakal seoemoer idoepnja tertjangtjang di tempat reba, boeat slamanja di rampok kegi-
