— 132 —
lantaran berkeras, ia sengal-sengalan en.....djatohken kemoedian dirinja.
„O, ati-ati, anak! kau nanti bikin diri moe terlebi sakit“, adalah soeara sang ajah. Sang anak berbalik en pegang padanja dengen kentjeng.
„Akoe tida perdoeli ― akoe tida perdoeli. Akoe maoe bikin sakit diri koe. Akoe maoe mati. Akoe tida maoe hidoep begini!“
Setelah ia meliat toean-toean dokter, hatinja mendjadi terlebi antjoer en memegang papanja semingkin kentjeng ia mendjerit: „Djangan! djangan! soeroe ia pergi. Ia tida boleh liat akoe. Oa tida boleh langgar akoe. Ia pada maoe bikin akoe baek lagi en akoe tida maoe baek, tida maoe baek!“
Toean-toean dokter telah berlaloe, olehkerna adanja ia di kamar brengkali mengganggoe njang sakit en ENG TJAIJ lagi tjoba lepasken dirinja dari tangannja HOK OEN njang menjangkel di lehernja. HOK OEN rasanja telah boeat pelok papanja terlebi lama lagi; begitoe poen ia lepas tangannja en ENG TJAIJ taro itoe dengen plahan di atas bangkoe.
Lagi-lagi itoe roepa manis di portret membikin ia mendjadi sabar en sepegimana doeloean, begitoe poen sekarang ia rasahken pikirannja legahan.
„Pa!“ mengata sang anak dengen soeara njang ampir tida kedengeran, „biarken lah akoe mati. Bilanglah, njang toean-toean itoe tida nanti berdaja aken membikin akoe segar lagi.“
ENG TJAIJ tida bisa menjaoet. Ia tertjengang en hatinja rasanja petja. Ia kira, njang satoe
