— 226 —
toe ada soesa boeat Kim Boe toet datengi.
Lie Eng tida bisa lantas ambil poetoesan, hanja roendingken ini perkara pada satoeroenja. Satelah semoea Hohan menjataken satoedjoe, baroelah ia bikin pasoekan itoe djadi tiga dan berangkat djalan.
Sigra djoega pasoekan itoe berdjalan dengen tjepet, dan waktoe matahari ampir silem, barisan itoe telah sampe di Tongtjianghoe.
Tee Tjong jang djalan lebi doeloe sabagi djoeroe kabar, lantas dateng membri taoe: bahoewa Kim Boe-toet poenja barisan depan soeda ampir sampe, dan kaloe itoe panglima Kim dapet liat pasoekan Immatjwan, tentoe djadi pertempoeran.
„Baek kita menjingkir, sebab kita toeh tida maoe bertempoer boeat jang tida bergoena,“ kata ia lebi djaoe.
Lie Eng toeroet itoe advies dan prenta barisannja ambil laen djalanan, dan itoe waktoe hari soeda djadi gelap. Kerna salaennja matahari telah silem, djoega langit ada mendoeng.
Tapi koenjoeng-koenjoeng laen djoeroekabar dateng membri taoe, bahoewa orang Kim poenja pasoekan telah sampe. hingga barisan Immatjwan soeda tida kaboeroe boeat menjingkir dengen beres. Atas prentanja masing-masing poenja kapala, liauwlo-liauwlo itoe pada berpentjaran ka
