— 284 —
Loei Sioksiok poenja iboe," saoet istrinja Tjioe Thong jang lantas tjeritaken lebi djaoe: „doeloe iboenja Loei Sioksiok itoe, jang memang soeda toea, ada tinggal di sini bersama-sama kita-orang. Tapi blakangan, satoe kaponakannja lantas adjak pinda ka Tjeetjioe. Pada brapa hari jang laloe, waktoe Siangkong poelang dan salagi maoe be- rangkat ka Tengnoensan, ia denger kabar jang njonja toea itoe telah roedin, hingga sang kaponakan jang doeloe adjak padanja, soeda perlakoeken dengen tida pantes. Mendenger itoe kabar Siangkong djadi merasa kasian dan tida tega boeat antepin sadja. Maka berangkat itoe ia oeroengken dan pergi doeloe ka kota boeat bawa itoe njonja toea bersama-sama aken diadjak ka sana. — Inilah sebabnja jang mendjadi lambat."
„Oh, oh, kiranja begitoe," kata Tee Tjong dan Jo Liem sambil manggoet-manggoet.
Tjioe Kiongdjin lantas prenta itoe baboe sadiaken barang hidangan. Kamoedian ia berkata poela: „Sabenernja, maski pergi ka kota poen, tida sampe begini lama. Sataoe ada halangan apa jang menahan padanja berhari-hari. Akoe djoega merasa tiada enak hati. Tapi lantaran dalem roema tida ada orang, salaennja orang-orang prampaoen dan boedjang lelaki ketjil, maka tida ada orang jang boleh diprenta menjoesoel."
Sahabisnja berkata, itoe baboe membri taoe, ba-
