— 39 —
Dalem sapandjang papreksahan, ternjata ini kawanan dorna betoel ada bersala dalem perkara-perkara jang ditoedoe. Maka satoe poetoesan laloe dikaloearken, jaitoe boewang padanja di bilangan kota Pian-okkoen, sedeng kakajahannja jang terdapet dengen djalan tida halal, dirampas boeat negri.
Poetoesan itoe laloe dikirim pada Keizer, jang lantas tetepken dan prenta, ini hari djoega persakitan-persakitan itoe moesti lantas dibawa kaloear dari ini kota.
Rahajat negri jang sering rasaken kadjahatannja itoe kawanan dorna, satelah denger itoe kabar, djadi amat girang. Marika itoe lantas bersoerak dan berdjingkrak-djingkrak sambil berkata:
„Achir-achir dateng djoega itoe hari, dimana kaoe semoea aken trima pembalesan atas kakedjaman dan kadjahatanmoe.“
Tatkala itoe Lie Kong jang ada memangkoe djabatan Siansi Joesin, laloe oendang Liap Djiang dateng ka roemanja, aken berempoek. Satelah orang itoe dateng, lantas disilaken doedoek dan Lie Kong berkata:
„Itoe toedjoe dorna maski soeda terhoekoem tapi belon begitoe memoewasken hatinja rahajat. Baginda tida maoe djatoken hoekoeman mati pada marika itoe, tida laen dari lantaran koeatir djadi
