— 60 —
Soe-touw dan Tiauw Peng-tiong, boeat madjoeken tentara aken menjerang orang Kim.
„Ini waktoe pasoekan Kim belon boleh diserang,“ kata itoe panglima toea: „bersabarlah sedikit waktoe, sampe akoe poenja soedara Tjiong Soe-tiong bersama doea laksa soldadoe pilihannja dateng ka mari, baroe kita moelai, —— dan sampe di itoe waktoe poen masi belon kasep.“
Lie Kong toeroet dan tida berkata lebi djaoe. Tapi Tiauw Peng-liong jang ada di sitoe laloe berkata:
„Tapi menoeroet pikirankoe ada laen sekali.“
„Laen bagimana?“ tanja Soe-touw.
„Kota Piankeng soeda terkoeroeng boekannja sedikit waktoe, hingga baginda salaloe djadi koeatir dan pikirannja saban-saban bisa bergontjang dan tida tetep. Rahajat negri poen ada amat katakoetan, kaloe sabegitoe lama pasoekan moesoe belon teroesir. Sekarang kita toeh soeda mempoenjai tigapoeloe laksa balatentara, boeat apatah moesti ditoenggoe lagi doea laksa ?“
„Baek kita bernanti, kerna itoe doea laksa ada bergoena besar.“
„Abis djikaloe Tjiong Soe-tiong jang ditoenggoe sakean lama belon djoega dateng, apatah sabegitoe lama masi djoega belon maoe tempoer pada moesoe? Menoeroet pikirankoe ada lebi
