— 634 —
nanti bilang, kaloe satoe gadis bertjidra dengen satoe djedjaka? Laen dari begitoe, iboe jang sekarang, boekan iboe jang melahirken, dan djoega pikirannja kaliatan ada gelap sekali. Maka kaloe ia sampe djadi bertjidra dengen itoe djedjaka edan, blon tentoe iboe itoe nanti bisa selidiki siapa jang sala dan siapa jang bener. Malahan sala-sala itoe iboe nanti mendoega, ia, Bong Loan, jang bengkeng dan tida mengindahken 'ma koewalon.
Lantaran menginget demikian djoega, maka Ko Siotjia saboleh-boleh soeda tahan sabarnja. Tetapi ia berniat tetep aken kasi tegoran keras pada itoe lelaki jang koerang adjar, soepaja laen kali ia tida brani lagi oendjoek kakedjiannja. Maka sigra djoega ia berkata sambil mengawasin pada itoe orang biadab dengen merasa djemoe.
„Kau mengakoe tida kenal itoe hikajat?" Itoelah kau melaga bodo! Orang sering bilang, satoe Siotjai moesti mengenal segala hikajat doenia! Soeatoe moestail, tjoema kau sendiri sadja, dengen boetaken mata, soeda bisa loeloes dalem itoe oedjian ? Kaloe bener begitoe, boekanlah laen orang, tapi dengen itoe gelaran Sioetjaij, kau soeda bikin bodo pada diri sendiri! Seperti akoe,
