— 107 —
gerakan jang begitoe gesit dan laloewasa, dengen gampang sadja bisa melindoengin iapoenja tiga bagian anggota itoe, sebab ia taoe bahoea Tie Tjong Siansoe ada paham ilmoe djioe-koet-hwat dan eng-djiauwkang jang tida boleh dipandang enteng, sebab satoe kali ia bisa memoekoel atawa menjengkerem pada bagian anggotanja jang lemah, dimana iapoenja khikang tida bisa sampe, pasti sekali aken membinasaken.
Tie Tjong Siansoe meliat gerakannja iapoenja moesoeh begitoe sebat dan soeker diserang dengen berhasil, laloe robah iapoenja tjara bersilat sama ilmoe Tat-mo-koan, samatjem ilmoe silat jang paling diandelin oleh orang-orang dari tjabang Siao Lim Sie; tapi Boe Beng Hiap Kek poen paham ini matjem ilmoe. Tjoema kaloe lebih doeloe ia tida bermaksoed membinasaken djiwanja Tie Tjong Siansoe, sekarang lantaran lawanannja itoe goenaken ilmoe silat jang sanget lihay dan berbahaja, boeat melindoeng diri sendiri terpaksa ia poen bersilat dengen tida mengenal kasian lagi, sebab kaloe orang bersilat dalem ilmoe Tat mokoan jang berbahaja, oleh kerna kadoea fihak poenja ilmoe kapandean ada sama tingginja, moesti ada salah satoe fihak jang roeboeh dengen mendapet loeka berat atawa poen tiwas djiwanja.
Pada sasoedanja iaorang bertempoer saratoes djoeroesan lebih. Boe Beng Hiap Kek moelai menjerang dengen seroeh, kerna itoe waktoe Tie Tjong Siansoe soeda moelai kendoran napsoenja, jang bisa dikatahoei bahoea iapoenja tenaga soeda moelai koerangan, hingga gerakannja poen djadi samingkin lambat, tida begitoe gesit lagi seperti bermoela. Satoe kali Tie Tjong Siansoe meliat satoe koetika baek, lantas bikin penjerangan dengen nekat, ia goenaken satoe tipoe jang dinamaken swan-hong-sauw-yap, samatjem ge-
