Halaman:Boe Beng Hiap Kek.pdf/113

Halaman ini tervalidasi

— 109 —

tida kasiken lawanannja bergerak lebih djaoeh, hanja lantas goenaken tipoe tie-goe-tiong-tjioe, seroedoekin iapoenja kepala ka djoeroesan dadanja iapoenja lawanan dengen menggerakin djoega iapoenja ilmoe khikang.

Tatkala kapalanja Boe Beng Hiap Kek mengenaken dadanja Tie Tjong Siansoe, tjoema kadengeran soeara seroehannja itoe kapala goendoel dan berkrotokannja toelang-toelang dada jang pata, kamoedian badannja itoe kapala goendoel mentjelat ka blakang dan djato di soeatoe tempat jang kira-kira doeapoeloeh kaki djaoehnja di mana ia menggletak dengen dada mengaloearken banjak darah dan tida bisa bergerak lagi. Sebab iapoenja dada soeda melesek, djantoeng dan peparoenja mendapet loeka-loeka berat. Sedeng ia­ poenja djiwa lebih siang soeda melajang ka acherat boeat katemoeken Giam Koen.

Boe Beng Hiap Kek jang biasanja tinggal adem dan sabar, satoe kali ini napasnja sengal-sengal dan djidatnja mengoetjoerken banjak kringet, kamoedian ia mengelah napas dan berpaling pada iapoenja istri, jang itoe waktoe djoestroe menjamperin padanja.

„Oh, soenggoe berbahaja sekali!” kata Boe Beng Hiap Kek. „Inilah akoe poenja salah, lantaran lebih doeloe terlaloe permaenken pada akoe poenja lawanan, hingga membikin djadi mendapet koetika boeat desek akoe ka satoe podjokan, dan akoe poen terpaksa moesti goenaken tipoe jang berbahaja boeat menangkis dan djatoken padanja dalem keadahan jang tida bisa ditoeloeng lagi. Soenggoe sajang sekali saorang jang mempoenjai ilmoe kapandean seperti Tie Tjong, soeda tersesat pikiran meloeloe lantaran mendengerin gosokannja iapoenja tjoetjoe moerid. Kaloe sadja ia bisa bersama haloean dengen kita, tida bisa disangkal jang ia ada satoe pembantoe jang sanget berharga.”