— 110 —
„Ja, kaloe maloe bitjaraken sadja prihal iapoenja ilmoe kapandean,” saoet sang istri „memang djoega kaoe poenja omongan ada betoel, tapi Tie Tjong Siansoe ada saorangjang moraal nja soeda bedjad, biar bagimana djoega, soeker sekali boeat diperbaekin, maka tida goenanja kaoe djadi menjesel.”
„Kaoe poenja omongan ada lebih beralesan dari akoe," kata lagi Boe Beng Hiap Kek; „sedeng akoe poenja berdiam disini bebrapa taon lamanja, ternjata ada satoe kegagalan, sebab akoe soeda tilik Tan Hoe Yoe dan ia poenja koeiawarga jang laen laennja semoeanja ada orang-orang jang bersoemanget ketjil,. tjoema maoe mendapet kasenangan di depan mata, tapi sanget takoet bekerdja besar jang bisa membahajaken marika poenja kadoedoekan, sekali poen iaorang masih merasa tjinta pada karadjahan Beng jang soeda moesna. Oleh kerna itoe djoega, akoe soeda ambil poetoesan pasti boeat berlaloe sadja dari ini tempat, kerna tida ada goenanja boeat akoe tinggal lebih lama. Tjoema sadja roepanja tida boleh dibilang gagal sama sekali, sebab Tan Kie Hou poetranja Tan Hoe Yoe jang toenggal, soeda meresep betoel sama akoe poenja didikan, malah kaloe sadja akoe menjataken jang akoe paham ilmoe silat, nistjaja ia aken soeka mengikoet padakoe, tida perdoeli ka oedjoeng langit djoega.”
„Kaloe begitoe, nanti sadja pada waktoe kaoe maoe brangkat, kaoe boleh kasi taoe hal itoe padanja, soeamikoe,” kata sang istri. „Brangkali sadja kaloe ia mengikoet ka kita poenja tempat boeat bladjar ilmoe silat, dengen pelahan kita bisa tanem kita poenja angen-angen dalem iapoenja hati jang masih saderhaha, hingga kamoedian kaloe ia soeda poelang aken bisa pengaroehin iapoenja koeiawarga dan pendoedoek
