— 112 —
Sehabisnja berkata begitoe boeroe-boeroe ia lari masoek ka dalem dan teroes menoedjoe ka iapoenja kamar boeat mentjari pada goeroenja. Sabegitoe lekas ia bertemoe pada goeroenja jang djoestroe berdoedoek di depan iapoenja medja toelis, boeroe-boeroe ia berloetoet dan mendjoera.
„Soepo, sekarang akoe boekan sadja mendjadi kaoe poenja moerid dalem ilmoe soerat,” kata ia, „tapi mendjadi djoega soepo poenja moerid dalem ilmoe silat, kerna sekarang akoe mengangkat soepo mendjadi goeroe.”
Dengen tida menoenggoe djawaban lagi ia lantes mendjoera sampe ampat kali. Tapi Tan Ko Wie golengken kapalanja sembari berkata; „Moeridkoe, sekali poen akoe bisa trima kaoe poenja permintahan boeat bladjar ilmoe silat padakoe, tapi menjesel sekali akoe tida bisa mengadjar kaoe di ini tempat, sebab di hari esok akoe aken brangkat meninggalken ini tempat.”
PENOETOEP.
Siapatah itoe Boe Beng Hiap Kek?
Tan Kie Hou satelah mendenger itoe omongan, tida berbeda sebagi djoega mendenger soeara goentoer di atasan kapalanja, hingya boeat bebrapa sa'at lamanja ia djadi seperti orang kasima. Achirnja ia mengoetjoerken aer mata sembari sasenggoekan.
„Oh, soepo, biar poen kaoe tida aken tinggal lebih lama disini, tida oeroeng akoe maoe mengikoetin kamana sadja soepo aken pergi, kerna moerid ingin pladjarken ilmoe silat,” kata ia. „Tapi, apatah moerid boleh menanja, mengapa mendadak soepo maoe brangkat pergi dari sini?”
