12
TJERITA ROMAN
Djika doeloe ia tjoema bisa menangis dan menangis, ia sekarang moelai bisa mengotjeh sebagi beo, berbitjara dengen bahasa jang aneh dan tjoema ia sendiri jang mengerti.
Kapan anak itoe masih orok, ajah tjoema ambil sebagian ketjil boeat empo atawa adjak bertjanda. Tapi djika baji itoe soedah moelai bisa djalan dan berbitjara sebagi Tiong-gie sekarang, bapa itoe lantas ambil bagian banjak djoega boeat memongmong.
Alam soesoen brapa tingkatan masa sepandjang penghidoepan manoesia. Djika kita soedah akil-baleg, kita inginken pasangan hidoep. Di masa soedah pantesnja mempoenjaken anak, kita terbit perasa'an kepingin empo baji; dan di masa pantes mempoenjaken tjoetjoe, perasa'an kita laloe membajangken kemoengilannja satoe tjoetjoe. Maka, djika di waktoean kita pantes mempoenjaken anak, tapi kita tida poenjaken anak, bajangan dari anak-anak jang moengil senantiasa terbajang dalem perasa'an. Begitoepoen djika kita soedah djadi kakè atawa nènè, tapi tida poenjaken tjoetjoe, kita lantas indamken tjoetjoe seperti prempoean boenting moeda indamken roedjak.
Kapan Tiong-gie telah bisa oetjapken perkata'an; „Papa!”, tjoema ini sadja dan tida laen, Tiang-han soedah kegirangan setengah mati.
