— 61 —
bepikir sakoetika, sekalian ponggawa ini rata berkata, bahoewa di dalam karaton tida ada orang jang lebih pande dari KHONGTJOE aken loepoetken baginda radja dari tipoenja orang, atawa aken robahken perkara djelek, biar djadi perkara bagoes aken goena karadjaän atawa aken kaoentoengannja rahajat. Maka ija-orang lantas membri ingat pada baginda, soepaja djikaloe baginda pergi berdjoempa pada radja Tjee, baginda nanti bawa KHONGTJOE pergi beserta, djangan kasih KHONGTJOE berlaloe dari damping, dan toeroet dengan betoel KHONGTJOE poenja adjaran, baik di dalam hal apa poen. Baginda radja djadi merasa girang sekali, oleh kerna melihat mantri-mantrinja ada menaro indah pada KHONGTJOE, sabagimana ija sendiri. Ija lantas pangil KHONGTJOE dan bri taoe adanja hal.
Dengan lantaran KHONGTJOE poenja mata jang tadjam, adat pendiam, hati tetap dan daja-oepaja jang berfaedah, boekanlah sadja antero perniatannja radja Tjee itoe dapat dibade dan dibatalken, hanja radja itoe djadi terpaksa aken sigra kirimken ka karaton Louu, satoe oetoesan jang mendjoendjoeng titah boewat sampeken sabda pada radja Louu, bahoewa baginda radja Tjee meminta maäf, djoega boewat mengoeroes perkara poelangken pada radja Louw tiga kota di watas karadjaän, jang doeloe hari teritoeng pada karadjaän Louu dan dirampas oleh radja Tjee dengan djalan hianat. Sadari waktoe dipoelangkennja tiga kota itoe, karadjaän Louu dan karadjaän Tjee itoe djadi bersobat satoe sama lain, dan salama hidoepnja itoe doewa radja, persobatan itoe berdjalan teroes dengan tida sekali ada terganggoe.
Tiada perloe diseboet lagi, bahoewa itoe perkara baik jang telah djadi pada karadjaän Louw dengan lantaran boedinja KHONGTJOE, ada menambahi hormatnja dan penoedjoenja orang pada ini goeroe besar, demikianlah djoega tjintanja baginda serta rahajat, dan kabesaran namanja KHONGTJOE di dalam ingatan marika ini.
