— 63 —
djadi toeladannja bangsa-bangsa itoe. Itoe karadjaän Oeue nanti djadi satoe toeladan indah sabagimana karadjaän kita ini soedah taoe djadi, kerna sekarang itoe goeroe boediman telah pergi ka karadjaän itoe. Sahaja tida mengarti, bagimana kaoe boleh biarken sadja KHONGTJOE berlaloe, dan tiada sekali tjoba tjegahken berangkatnja."
Itoe KOEI SOEN lantas berkata, bahoewa ija soedah tiada pandang itoe perkara dengan beringat bagitoe. „Tapi sekarang," katanja poela: ,matakoe telah terboeka, dan akoe nanti perboewat apa jang boleh, aken betoeli itoe perkara jang salah."
Komoedian dengan sasoenggoehnja djoega KOEI SOEN itoe memboektiken djandjiannja, dan oleh kerna itoelah baginda AIJ KONG membri titah, aken panggil KHONGTJOE poelang ka negri sendiri. Tempo KHONGTJOE datang kombali di karadjaän Louu, baginda radja toenggoe datangnja di soewatoe astana di loewar kota, pada sasoedah menanjaken lebih doeloe, di waktoe mana KHONGTJOE nanti datang, dan baginda samboet datangnja goeroe ini dengan kahormatan, sabagimana jang biasa dibriken pada oetoesannja radja-radja besar. Lama baginda doedoek berkata-kata sama KHONGTJOE di dalam itoe astana, tapi jang dibitjaraken oleh ini baginda jang memang tida berboedi dan ada koerang pikiran, melinken perkara jang sia-sia sadja; tapi maski bagitoe, sanantiasa KHONGTJOE sahoeti sabda baginda dengan penjahoetan-penjahoetan jang menggenggam pengadjaran. Degan lantaran ini hal berkata-kata, KHONGTJOE poen soedah merasa, bahoewa baginda ini boekan orang boediman; tapi beroelang-oelang KHONGTJOE tjoba mendatangken pikiran baik pada baginda, dan membri roepa-roepa lantaran aken baginda djadi terkenang pada deradjat diri sendiri; lain dari bagitoe, KHONGTJOE goenaken djoega pribahasa aken
