— 87 —
Boewat bri taoe KHONGTJOE poenja pikiran atas hal lain, jang haroes terpandang ada oetama aken manoesia, biarlah kita toetoerken di sini dengan pendek penjahoetannja KHONGTJOE kapada baginda radja jang menanjaken hal manoesia.
Sasoedah KHONGTJOE menjataken moeljanja boedi, jang membri kamampoeän aken dapat mengarti, aken membanding-banding dan aken menimbang-nimbang atas hal sasoewatoe, dan sasoedah ija toetoerken kahidoepannja manoesia di dalam temponja manoesia haroe terdjadi, djoega di dalam temponja membesarin, djadi koewat, dan djadi hilang kakoewatannja, KHONGTJOE lantas berkata bagini:
Badan manoesia poenja bagian jang haloes dan tida bertoeboeh, poelang kapada Allah, dari mana ija soedah toeroen; hawa atawa napas menjampoerken dirinja pada oedara, dan bagian jang tjajer dan jang berätsal dari boemi, mendjadi satoe kombali sama ajer dan tanah. Orang-orang boediman berkata: manoesia itoelah soewatoe mahloek jang amat adjaib, di mana ada berkoempoel sifatnja sekalian mahloek jang lain. Ija ada ampoenja akal-boedi, ija boleh disampoernaken, ada poenja ichtiar (kamerdikaän hati) dan pri baik aken bergaoelan; ija bisa membeda-bedaken, bisa membanding-bandingken, bisa berlakoe dengan maksoed jang tantoe, bisa memilih atoeran, atawa tjari daja-oepaja aken dapatken maksoed itoe. Ija bisa perbaiki atawa perboesoeki dirinja, dengan lantaran menggoenaken dengan niatan baik atawa dengan niatan djahat ija poenja boedi dan kamerdikaän hati; ija taoe dan merasa di hati, apa adanja kabedjikan dan kadjahatan, dan ija merasa di hati, bahoewa ija ada poenja kawadjiban besar jang misti dilakoeken pada Allah, pada diri sendiri dan pada sasama manoesia. Kaloe ija lakoeken roepa-roepa kawadjibannja itoe, njatalah jang ija saorang baik dan haroes dapat gandjaran dan dinapsoeïn
