3
HIKAJAT
Si Umbuik Mudo
Adolah bando satu bando
Talatak dalam pasia badjak
Hambo hikajatkan si Umbuik Mudo
Dengan Puti si Galang Banjak
Hari nan sadang tangah hari tapek sadang baga 'anggang matohari sadang bunta bajang2 sadang linduang saliguri sadang litak letal andjiang sadang antjik2 urang diladang sadang anok2 unggeh sadang langang rang dikampuang sadang rami rang dibalai.
Pado maso dewaso itu takana bana diamai si Umbuik bapantun pantun sorang apolah buah bunji pantunnjo
Siambek buah siambek
Diambiak rang mandjadja
Badan den batambah gaek
Anak nan balun bapangadja
Nak duo pantun sairiang apolah buah pantunnjo:
Talatak talutan lutan
Talatak didalam padi
Oi anak kamari den katokan
Supajo anak buliah diadjari
Turunlah si Umbuik Mudo dari andjuang maligainjo sarato tibo injo batanjo oi amai djo den di amai apokoh kaba dengan barito
Mandjawab amai si Umbuik oi Bujuang djo den di Bujung mangko anak den imbau kamari ado nan labiah den rusuahkan ado nan labiah den risaukan
