Manjawab amai si Umbuik, “Oi anak joden di buyuang, mangko anak denai himbau ka mari, ado nan labiah denai rusuahkan, ado nan labiah denai risaukan, indak duduak taduduakan di denai, indak tagak tatagakkan di denai, indak lalok talalokkan di denai, nasi dimakan raso sakam, ayia diminum raso duri, bak itu bana hati denai ko kini.”
Manjawab si Umbuik Mudo, “Oi amai joden di amai, rusuah bana hati denai ko mah, mandanga kato Amai nantun, cubo bana amai curai papakan, nak sanang bana hati denai, apo bana nan amai rusuahkan, apo bana nan amai risaukan.”
Bakato pulo amai si Umbuik, “Nan labiah bana denai pikiakan, iyo waang balun bapakarajaan, balun baadok batagakan, balun karajo bausaho.”
Manjawab si Umbuik Mudo, “Oi amai joden di amai, apolah katagakan denai, apo bana kaadokan denai, apo bana pakarajaan denai, cubo bana amai kabakan, nak buliah denai pacik arek-arek, kok siang nak denai patungkek, kok malam nak denai pakalang.”
Manjawab amai si Umbuik Mudo, “Oi Buyuang joden di buyuang, manggaleh lai waang namuah?”
Mandanga kato nan bak kian, manjawab si Umbuik Mudo, “Bukan murah rang manggaleh, rang manggaleh tahu di labo dangan rugi, tahu di etongan aso jo duo.”
Batanyo pulo amainyo, “Jadi haato waang handaknyo, jadi gubalo waang lai namuah?”
Dijawab pulo dek Umbuik Mudo, “Oi Amai joden di amai, indak denai ka bagubalo, indak denai ka bataranak, tapi samantangpun bak itu, bukan denai tak namuah bataranak, hanyo awak den balun bapangatahuan, balun tahu di adat jo pusako, balun tahu di syarak jo syariat, balun tahu di ereang dangan gendeang.”
Batanyo pulo amainyo, “Jadi haato waang handaknyo, ka sawah ka ladang waang namuah?”
