Halaman:Si Umbuik Mudo.pdf/23

Halaman ini telah diuji baca

Mandapek Malu

Alah sahari inyo di rumah, lah duo hari antaronyo, datanglah gurunyo mamanggia, nan bagala Angku Panjang Jangguik, ka ranah ka Kampuang Aua, gurunyo baralek gadang, si Umbuik indak di rumah.

Lamo sabanta antaronyo, lah pulang si Umbuik Mudo, sanan bakato amainyo, “Ka mano Buyuang sajak tadi, urang mamanggia cako, mamanggia ka rumah guru, inyo nan baralek gadang, kini juo Buyuang pai, kini juo Buyuang bajalan.”

Manjawab si Umbuik Mudo, “Kok bak itu kato amai, insyaAllah baiaklah itu, denai bajalan kini-kini, iyo ka ranah Kampuang Aua, amai tariaklah pakaian denai, amai ambiaklah kain.”

Birawari amai si Umbuik, masuak inyo ka biliak dalam, dibukak peti nan gadang, mandariang bunyinyo kunci, ditariak pakaian si Umbuik Mudo.

Lah mamakai si Umbuik Mudo, diayun cando pajalanan, dibaokkan langkah nan limo, suruik ka langkah nan ampek, tagak badiri batua-batua, di muko camin nan gadang, dipandangi bayangbayang, tagak ka tangah lah bamanuang, tagak ka tapi lah managun, nan dilengong cincin di kiri, nan dipaliang cincin di kanan, bakato si Umbuik Mudo, “Oi amai joden di amai, pandang bana di amai, lai