Halaman:Si Umbuik Mudo.pdf/47

Halaman ini belum diuji baca

“Oi Buyuang joden di buyuang, “Nan satahun duo tahun iko, alun inyo ka bajunjuangan, alun inyo ka basuami, alun taniat nak balaki, inyo ka marando sajo, bak itu nan katonyo, kato si Puti Galang Banyak. Sungguahpun bak itu bana, dangakan pulo dek waang, Anak buayo guluang tanun Masuak kualo Indopuro; Apokoh dayo untuang balun Nantikan sajo kutikonyo. Koto sabab maadok Tiku Tiku maadok Koto Tangah; Sadang indak sabalah dahulu Nantikan sajo garak Allah. Tak jiran bingkudu lai Alun pandan ka bagadang; Tak niat itu lai Alun badan ka tagamang. Nambek hati di parusuah, nancik hati di parisau, usah Buyuang cameh bana.” Manjawab si Umbuik Mudo, Iyo pulo nan di Amai, bana pulo tu mah, tapi saketek nan maraso dalam hati, pituah juo di Amai, malangkah tak sadang salangkah, nan sakali diduokan, duo cukuikkan ka tigo, cukuik tigo kato putuih, baitu juo nan biaso, bak itu juo nan dipakai. Pailah Amai sakali lai, mintak bana kato nan putuih, nak jan taraso-raso juo.” Mandanga kato nan bak kian, hilanglah aka amai si Umbuik, lah sasak kiro-kiro. Takatiak takitun-kitun Salimbado di dalam liangnyo; Tatagak tatagun-tagun Bicaro di badan surang. 36