Boe Beng Hiap Kek/Penutup
PENOETOEP.
Siapatah itoe Boe Beng Hiap Kek?
Tan Kie Hou satelah mendenger itoe omongan, tida berbeda sebagi djoega mendenger soeara goentoer di atasan kapalanja, hingya boeat bebrapa sa'at lamanja ia djadi seperti orang kasima. Achirnja ia mengoetjoerken aer mata sembari sasenggoekan.
„Oh, soepo, biar poen kaoe tida aken tinggal lebih lama disini, tida oeroeng akoe maoe mengikoetin kamana sadja soepo aken pergi, kerna moerid ingin pladjarken ilmoe silat,” kata ia. „Tapi, apatah moerid boleh menanja, mengapa mendadak soepo maoe brangkat pergi dari sini?” „Akoe maoe balik poelang ka Tjongan, kerna soeda terlaloe lama akoe tida taoe poelang menengokin akoe poenja koelawarga,” kata Tan Ko Wie dengen soeara menghiboer; „tapi kaloe sadja kaoe sasoenggoenja berniat keras boeat bergoeroe dalem ilmoe silat padakoe, biarlah kaoe minggat sadja dari kaoe poenja roemah, dan akoe menoenggoein kaoe di tengah djalanan Makanja akoe kasi pikiran boeat kaoe minggat, kerna akoe taoe pasti bahoea kaoe poenja ajah jang tjoema mempoenjai kaoe satoe anak, biar bagimana djoega, tida nanti maoe mengidjinken kaoe pergi mengikoet padakoe ka Tjong-an. Tapi hal itoe kaoe moesti pikir sendiri dan djangan djadi menjesel di hari kamoedian.”
Tan Kie Hou tida menjaoet, hanja lantas berbangkit dari atas djoebin dimana ia berloetoet, kamoedian ia baroe berkata; „Itoe hal akoe aken pikir lagi sampe sabentar sore.”
„Ja, memang ini oeroesan kaoe moesti pikir dengen pandjang, tida boleh terlaloe terboeroe boeroe.” Di itoe sore, Tan Ko Wie pergi mengoendjoengin roemahnja Tan Hoe Yoe, pada siapa ia mengasi taoe bahoea di hari esok ia maoe meletakin djabatannja, kerna ia ada satoe oeroesan jang sanget penting moesti balik poelang ka kampoeng kelahirannja. Tan Hoe Yoe djadi sanget terkedjoet, dan sabisa-bisanja ia menahan soepaja Tan Ko Wie soeka meneroesken lagi pakerdjahannja sampe di boentoetnja taon; tapi Tan Ko Wie menjataken dengen menjesel ia tida bisa trima itoe oendangan, malah ia menjataken djoega bahoea lantaran ia brenti dengen mendadak, maka iapoenja salaris dalem ini satengah taon ia tida aken trima, satoe dendahan atas iapoenja kabrentian di satengah djalan.
Tapi soeda tentoe sadja Tan Hoe Yoe tida soeka berboeat begitoe.
„Kaloe begitoe, apatah sinshe bisa moendoerken sinshe poenja hari brangkat sampe di hari jang katiga?" kata ia, „Sebab di hari esok dan noesa, kita orang aken bikin pesta perdjamoean boeat mengasi slamet djalan pada sinshe; hari pertama akoe sendiri jang oendang, dan hari kadoea orang-orang toewanja itoe semoea moerid jang mengoendang. Akoe rasa tentoe sinshe tida kaberatan boeat lambatken kaoe poenja brangkat doea hari sadja.”
Tan Ko Wie berpikir sabentaran, oleh kerna sabetoelnja ia tida perloe terlaloe boeroe-boeroe, maka ia pikir katerlaloean sekali djika ia menoelak itoe oendangan jang dilakoeken dengen hati soenggoe-soenggoe
„Oleh kerna akoe djadi maloe hati djika menoelak keras toean poenja oendangan jang manis boedi," kata ia, „maka terpaksa akoe moesti moendoerken djoega akoe poenja waktoe brangkat sampe doea hari kamoedian; tapi lebih dari itoe doea hari, sasoenggoenja tida bisa.“
Tan Hoe Yoe merasa girang sekali mendenger Tan Ko Wie soeka meloeloesken iapoenja oendangan, dan itoe waktoe djoega ia oendang itoe goeroe sekola boeat toeroet doedoek dahar malem sama ianja, oendangan mana ditrima oleh Tan Ko Wie. Biar poen tjoema makanan sari-sari sadja, tapi ada banjak lebih baek dari biasanja, malah ada disediaken djoegoe arak toewa jang baek. Tapi Tan Ko Wie minoem sedikit sekali, sasoedanja tiga tjangkir ia lantas menoelak boeat minoem lebih djaoe. Di hari jang brikoeinja, dalem roemahnja Tan Hoe Yoe dibikin satoe perdjamoean makan minoem jang sanget rame, dengen dikoendjoengin oleh banjak sekali orang, jang semoeanja ada sanak koelawarganja itoe familie Tan, sedeng itoe pesta ada boeat kahormatannja Tan Ko Wie jang aken brangkat pergi pada hari noesa. Semoea orang makan minoem dengen bergoembirah, dan ampir semoeanja menanjaken kapan Tan Ko Wie aken balik kombali ka Ankhee; tapi itoe semoea djawaban oleh Tan Ko Wie didjawab sadja belon tentoe, dan saoepamanja tida ada halangan tentoe ia aken balik kombali. Itoe pesta sampe djaoeh malem baroe boebaran.
Pada malem jang berikoetnja, satoe pesta makan minoem jang diadaken oleh semoea orang-orang toewanja Tan Ko Wie poenja moerid, dibikin dalem itoe roemah sekola jang loeas; tapi ini kali ampir semoea orang makan minoem dengen hati tertindi, sebab iaorang merasa sanget tida tega berpisahan sama itoe goeroe sekola jang pinter dan baek boedi. Di waktoe itoe pesta soeda maoe sampe di achirnja semoea orang berbangkit dari tempat doedoeknja dan kasi slamat djalan pada Tan Ko Wie dengen tiga tjawan arak.
Tan Ko Wie samboet itoe pembrian slamet dengen minoem lantas tiga tjawan arak, kamoedian ia bikin sedikit pembitjarahan.
„Toean-toean, sekalian jang terhormat," moelai ia, „sadari bebrapa taon lamanja akoe berdiam di ini tempat dengen mendapettoean-toean sekalian poenja perlakoean jang manis dan baek, hingga akoe merasa sanget bersoekoer dan betah sebagi di kampoeng kalahirankoe sendiri. Ini hari dengen tida terdoega akoe moesti berpisahan sama toean-toean sekalian, sasoenggoenja akoe poenja hati merasa sanget berat dan sedih, tapi lantaran satoe kawadjiban jang akoe tida bisa poengkir, terpaksa akoe moesti kerasken hati boeat berpisahan djoega sama toean-toean sekalian. Sekarang dari sebab akoe dengen lekas aken berpisahan sama toean-toean sekalian, maka akoe ambil kabranian boeat bitjara sedikit, sebagi tanda peringetan dan kita poenja berpisahan satoe sama laen.
„Akoe tida lebih ada saorang sekolahan jang tida mempoenjai pladjaran dan kapandean jang boleh dikagoemin, lapi tida oeroeng soeda mendapet toeantoean sekalian poenja perindahan dan kahormatan besar, hingga tjoema membikin akoe poenja hati djadi merasa maloe sadja. Sekarang djikaloe akoe ada kesalahan bitjara apa-apa, akoe sanget harep sadja toean-toean sekalian soedi membiri ma'af dengen satoeloesnja hati.
„Dalem ini bebrapa taon akoe berdiam disini, akoe telah mendapet kanjatahan bahoea toean-toean sekalian ada sanget rempoek dan roekoen di antara koelawarga dan sesama pendoedoek kampoeng, saling menoeloeng dalem waktoe kasoehan dan saling membantoe dalem perkara jang menggirangken, itoelah ada soeatoe sifat baek sagolongan pendoedoek, jang kaloe sadja diloewasken sampe di kalangan jang besar, sampe pada negri, nistjaja kita poenja tanah aer bisa mendjadi satoe karadjahan jang sanget besar dan berkoewasa.
Tjoema sajang sekali, ma'afken akoe, toean-toean, djika akoe poenja omongan ada sedikit koerang enak kadengerannja, ja sajang sekali, toean-toean sekalian ada terlaloe memperhatiken oeroesan penghidoepan sendiri, paling besar poen tjoema sampe pada penghidoepannja satoe koelawarga dan satoe kampoeng, tapi penghidoepannja satoe negri sama sekali tida diperhatikan oleh toean-toean sekalian.
„Dalem kita poenja pepatah adâ di bilang: Thian Hee Hin Bong, Pit Hoe Yoe Tjek, atawa: Djaja dan moesnanja satoe negri, sasoealoe rahajat ada mempoenjai kawadjiban, tegesnja kamadjoean atawa kamoendoerannja satoe negri, boekan meloeloe mendjadi tanggoengannja radja, minister dan laen-laen ambtenaar, hanja apa mendjadi tanggoengan djoega dari sasoeatoe rahajat, sebab djika negrinja koewat rahajatnja terindah, sebaliknja negri itoe moesna, rahajatnja terhina-hina.
„Sebagi boekti, akoe maoe oendjoek pada itoe bangsa Boan jang sekarang doedoek mamerentah di kita poenja negri, Asalnja iaorang dari bilangan Tongsam-she, tapi satelah iaorang berkoewasa dan memegang kendali pamerentahan dalem kita poenja negri, liatlah bagimana senangnja itoe orang-orang dari patkie (pasoekan Boan jang doeloenja madjoe menjerang ka Tiongkok Aseli, dan anak tjoetjoe teroes meneroes dimasoekin ka dalem itoe pasoekan jang terbagi mendjadi delapan bendera, dan masing-masing boleh menerima gadji boeta dengen toeroen menoeroen), dan hal itoe meloeloe bisa terdjadi lantaran marika poenja leloehoer telah oendjoek kegagahannja boeat mareboet kakoewasahan dalem oeroesan pamerentahan, maka sampe di iaorang poenja änak tjoetjoe, itoe kasenangan masih teroes bisa dirasakan.
„Bagimana dengen kita orang? Ada mempoenjai negri toch soeda dikasiken pada laen bangsa boeat doedoek mamerentah, dan kaloe sadja itoe bangsa jang mamerentah djoemblahnja lebih banjak dari kita, atawa poen sedikitnja ada sama banjaknja, maoe poen iaorang ada djaoe lebih pinter, hal itoe bisa dimengarti; tapi sekarang ternjata boekannja begitoe hanja djoestroe sabaliknja. Ini semoea disebabken kita orang terlaloe tida open sama oeroesan negri, dan tjoema bisa mengeloe sadja djika soeda rasaken perboeatan jang sawenang-wenang dan segala matjem tindesan atawa perkosahan. Maka sekarang akoe ambil kebranian boeat memperingetken pada toean-toean sekalian bahoea penghidoepan diri sendiri dan koelawarga memang perloe, tapi penghidoepannja satoe negri terlebih perloe lagi, dan kaloe sadja penghidoepannja satoe negri tida bisa didapetken, achirnja penghidoepan sendiri dan satoe koelawarga poen, tentoe aken djadi sanget melarat dan berwates. Harep sadja toean-toean sekalian djangan pandang enteng akoe poenja pembitjarahan ini, hanja kaloe soeda poelang, soeka pikir lebih djaoe dengen memake pemandangan jang loeas dan djaoe.”
Semoea orang jang mendengerin itoe pembitjarahan djadi sanget terharoe, tapi ada djoega sebagian jang djadi sanget terkedjoet, sebab sedikit banjak itoe matjem pembitjarahan sebagi djoega mengandoeng maksoed pembrontakan dan melawan terhadep pada kakoewasahannja pamerentah Boan, sekali poen tida ada dibitjaraken itoe oeroesan dengen perkatahan jang terang, Maloemlah di waktoe djemannja pamerentahan sawenang-wenapg, radja atawa keizer bisa ambil poetoesan sendiri sebagimana jang ia rasa baek.
Samentara Tan Ko Wie sehabisnja oetjapken itoe pembitjarahan lantas berdoedoek kombali di iapoenja korsi dengen adem, sedikit poen tida mengoendjoek pengrasahan kwatir atawa poen takoet, hanja sebagi djoega saorang jang baroe bitjaraken soeatoe oeroesan biasa jang tida penting. Sedeng orang-orang jang berada di sitoe, ampir semoeanja pada bitjara bisik-bisik satoe dengen laen, kerna iaorang menjangka bahoea Tan Ko Wie ada salah satoe anggota Hok Beng Sia, satoe perkoempoelan jang ingin mendiriken lagi karadjahan Beng jang telah dibikin moesna oleh bangsa Boan. Iaorang rata-rata merasa satoedjoe, tapi berbareng dengen itoe merasa takoet, kerna itoe oeroesan bisa berachir dengen satoe hoekoeman seantero koelawarga, bila itoe pakerdjahan mendjadi gagal. Antaranja ada teritoeng djoega Tan Hoe Yoe, jang memang soeda sering denger pembitjarahannja Tan Ko Wie dengen samar.
Tan Ko Wie poen mengarti bahoea itoe orang-orang ada terlaloe pandang berat marika poenja kaslametan dibandingken dengen kaslametannja seantero rahajat Tionghoa. Maka ia poen tida maoe bitjara lagi, hanja teroes minoem dan isi iapoenja tjawan sampe mendjadi sinting betoel-betoel, kamoedian ia hatoerken maaf dengen minta permisie boeat masoek tidoer, kerna ia soeda mabok keras dan tida tahan berdoedoek lebih lama lagi.
Di pagi jang brikoetnja, koetika orang dateng ka itoe roemah sekola boeat menganter pada Tan Ko Wie jang maoe brangkat poelang, ternjata itoe goeroe sekola soeda tida ada dalem iapoenja kamar, dan di atas medja toelisnja ada terdapet satoe soerat jang berboenji seperti berikoet:
Toean-toean pendoedoek Tan-Kee-tjhung jang terhormat.
„Ma'afken djika akoe terpaksa brangkat dengen tida berpamitan lebih doeloe sama toean toean sekalian, sebab di antara toean-toean sekalian, ada terdapet satoe penghianat bangsa, jang telah bikin pengadoean pada tihoe di Tjoantjioe bahoea akoe ada satoe pembrontak dan minta dikirim pasoekan balatentara boeat menangkep padakoe, dan akoe rasa paling laat sabentar tengahari, itoe pasoekan balaientara koeda jang maoe dateng menangkep padakoe aken sampe ka sini, kerna itoe penghianat telah brangkat malem-malem ka iboe kota afdeeling dengen menoenggang koeda. Oleh kerna itoelah dengen apa boleh boeat akoe brangkat pergi dengen tida berpamitan lebih doeloe sama toean-toean sekalian.
„Tan Ko Wie alias Boe Beng Hiap Kek,”
Semoea orang djadi samingkin terkedjoet, koetika membatja itoe tanda tangan jang begitoe menjolok mata, dan sekarang baroe iaorang mendoesin bahoea itoe Boe Beng Hiap Kek boekan laen dari itoe goeroe sekola jang keliatannja begitoe alim dan lemah lemboet sebagimana biasanja orang-orang sekolahan. Tapi oleh kerna sabentar lagi dengen lekas pasoekan bale tentara negri jang berkoeda aken dateng ka itoe roemah sekola boeat menangkep pada Tan Ko Wie, boeroe boeroe itoe soerat dibakar sampe mendjadi aboe. Sedeng iapocnja barang-barang koetika dipreksa ternjata semoeanja soeda tida ada barang sepotong jang katinggalan.
Di waktoe dekat tengahari, betoel sadja ada dateng saratoes limapoeloeh soldadoe berkoeda jang dikirim dari iboe kota afdeeling dengen bersendjata lengkep, tapi sekali poen itoe roemah sekola digleda sampe bebrapa djam lamanja tida ada kedapetan satoe apa, djangan kata lagi Boe Beng Hiap Kek jang memang soeda menjingkir. Sebagimana biasanja atoeran boeroek dari ambtenaar ambtenaar karadjahan Boan, dari sebab Tan Ko Wie tida bisa terrangkep, Tan Hoe Yoe dan Tan Hoe Koei bersama bebrapa orang penting dalem kampoeng Tan-kee-tjhung dengen zonder banjak bitjara lagi ditangkep boeat digiring ka kota Tjoan-tjioe.
Hal itoe soeda tentoe sadja membikin sanget iboek pada tamilienja itoe orang orang jang ditangkep. Oleh kerna itoe pasoekan koeda soeda berdjalan sakentjeng-kentjengnja dari iboe kota afdeeling Tjoan-tjioe dengen tida brenti brentinja, maka itoe malem iaorang mendiriken koeboe-koeboe di satoe lapangan, sedeng itoe bebrapa orang tawanan dikerem dalem koeboenja itoe officier jang mengepalai itoe pasoekan.
Tida taoenja di hari jang brikoetnja, mendadak Tan Hoe Yoe, Tan Hoe Koei dan laen-laenja, semoea dilepasken kombali, kerna Tan Ko Wie semalem soeda pasrahken diri ka koeboenja itoe officier, tapi dengen perdjandjian Tan Hoe Yoe dan laen laennja moesti dilepasken, sebab iaorang sama sekali tida berdosa dan tida taoe satoe apa prihal Tan Ko Wie poenja hal ichwal.
Di waktoe siangnja itoe pasoekan balatentara koeda giringken Tan Ko Wie ka kota Tjoan-tjioe dengen diborgol kaki tangannja dan dimasoekin djoega ka dalem satoe krangkeng besi, sedeng soldadoe-soldadoe jang mendjaga mengroeboengin itoe krangkeng besi dengen sendjata terhoenoes, bersedia boeat segala serangan jang tida terdoegah.
Sesampenja di Tjoan-tjioe, tihoe tida brani tahan lama itoe persakitan jang tersangkoet sama oeroesan pembrontakan, hanja teroes dikirimken ka iboe kota provincie Hok-tjioe; tapi sesampenja di iboe kota, baroe sadja semaleman dalem pendjaranja iboe kota, di esokan paginja orang soeda tida liat lagi pada itoe persakitan Tan Ko Wie, salaennja iapoenja borgolan kaki tangan jang semoeanja soeda mendjadi pata dan antjoer, sedeng rante-rante jang boeat merarite padanja poen, semoeanja soeda poetoes. Berbareng dengen itoe, kas negri di itoe iboe kota provincie itoe malem djoega soeda katjoerian sadjoembiah oewang saratoes riboe tai! perak, entah siapa pentjoeri-pentjoerinja dan dan digondol kemana.
Itoe masih belon semoea, di dalem kantoornja soenboe poen telah kahilangan tjap kabesarannja, dan di dekat peti itoe tjap kabesaran ada terdapet satoe soerat jang berboenji tegini;
„Kaoe poenja tjap kabesaran berikoet djoega itoe oewang jang berdjoembla saratoesriboe tail perak dari kas negri, semoeanja akoe jang ambil, perloenja boeat kasi taoe rasa pada kaoe orang jang mendjadi andjing-andjingnja Bangsa Boan, itoe oewang jang akoe ambil, tentoe kaoe orang terpaksa ganti dengen mengodol kantong sendiri, tapi kaoe orang poenja oewang didapetken dari darah keringetnja rahajat, maka akoe aken poelangken itoe pada rahajat sedeng itoe tjap kabesaran makanja akoe ambil, perloenja boeat mendjadi satoe antjeman pada kaoe poenja kawan sadjabat, kaloe sadja kaoe brani tarik pandjang ini oeroesan, nistjaja kaoe poenja tjap kabesaran tida aken dipoelangken kombali, malah kaoe poenja kapala djoega akoe nanti kasi adjar kenal sama akoe poenja pedang. Sekarang akoe kasi kaoe tempo lima hari boeat bikin beres semoea oeroesan, dan di hari jang kaanem kaoe aken dapet kombali kaoe poenja tjap kabesaran.
„Tan Ko Wie alias Boe Beng Hiap Kek."
Dengen sasoenggoenja djoega, itoe soenboe dari Hok-tjioe sama sekali tida brani tarik pandjang ito perkara katjoerian dalem goedang oewangnja negri, dan djoega prihal maboernja Tan Ko Wie dari pendjara, hanja ditoetoep resia dan diberesken dengen iaorang poenja tjara jang soeda terkenal. Betoel sadja pada hari jang kaanem itoe tjap kabesaran dipoelangken lagi ka tempatnja, tapi tida satoe manoesia jang liat dengen tjara bagimana itoe hal telah terdjadi. Tapi di itoe malem soenboe dari Hoktjioe telah alamken perkara jang tida enak sebagimana doeloean soeda perna dialamken oleh tikoan dari Ankhee, hingga ramboet, koemis, halis dan boeloe mata, semoeanja tertjoekoer bresih. Hal itoe sekali poen telah membikin itoe soenboe djadi sakit hati, tapi berbareng dengen itoe merasa sanget takoet, maka terlebih lagi ia tida brani tarik pandjang semoea perboeatannja Tan Ko Wie.
Sadari terkabar Tan Ko Wie dibawa pergi ka kota afdeeling, Tan Hoe Yoe sekali poen merasa sanget takoet, tapi tida oeroeng diam-diam ia soeroehan saorang kapertjajahannja pergi brangkat ka kota Tjoantjioe, kaloe perloe teroes ka Hoktjioe boeat mentjari taoe apa iang soeda terdjadi atas dirinja itoe goeroe sekola. Dalem bebrapa belas hari lamanja Tan Hoe Yoe merasa sanget kwatir dan djengkel, sebab iapoenja orang kapertjajahan belon balik kombali, dan tjoema pada waktoe ia maoe brangkat ka Hoktjioe, ia ada mengirim soerat mengasi kabar bahoewa Tan Ko Wie telah dikirim teroes ka iboe kota provincie, maka ia poen maoe pergi mentjari taoe di sana bagimana kasoedahannja.
Pada satoe malem, djoestroe Tan Hoe Yoe lagi berdoedoek di iapoenja kamar boekoe dengen pengrasahan djengkel dan sabentar-bentar kadengeran ia mengelah napas, mendadak di hadepannja ada keliatan berdiri satoe bajangan item, jang tjoema tertampak sadja sapasang sorot mata jang seperti kilap menjamber. Bermoela Tan Hoe Yoe djadi sanget terkedjoet, hingga ia djadi kamekmek, tapi kamoedian satoe pikiran masoek ka dalem iapoenja otak, ia lantas mengaloearken satoe seroehan girang sembari berbangkit dari tempat doedoeknja.
„Ha, hiantit, achir-achir kaoe dateng djoega!” berseroeh ia sembari menjamperin. „Sadari itoe hari akoe berkwatir teroes sahingga baroesan; tapi sekarang akoe haroes hatoerken trima kasi pada Thian bahoea kaoe soeda bisa meloiosken diri dengen slamet!”
Itoe orangjang boekan laen dari Boe Beng Hiap Kek lantas melepasken iapoenja kekoedoengan kapala, hingga lantas tertampak paras moekanja Tan Ko Wie, jang alim dan lemah lemboet, keadahan mana sasoenggoenja tida tjotjok dengen segala perboeatannja itoe Boe Beng Hiap Kek jang begitoe menakoetin dan soeda membikin peljah njalinja kawanan ambtenaar bangpak
„Akoe haroes hatoerken trima kasi pada entjek poenja boedi katjintahan terhadep padakoe,” kata Tan Ko Wie alias Boe Beng Hjap Kek sembari bersenjoem; „akoe poenja kadatengan sekarang ini, perloenja boeat berpamitan dan kasi slamet tinggal pada entjek, dan kaloe masi belon tidoer akoe ingin bertemoe djoega sama Kie Hou.”
„Akoe rasa ia belon tidoer, dan sekarang djoega akoe maoe pergi masoek panggil padanja,” kata Tan Hoe Yoe sembari bertindak kaloear dari itoe kamar boekoe dan masoek ka dalem.
Tida antara lama kamoedian kadengeran soearanja tindakan kaki jang berlari lari mendatengin, dan achirnja tertampak Tan Kie Hou jang menjamperin dengen tersanga sanga.
„Oh, akoe merasa girang sekali jang soepo soeda bisa dateng kombali ka sini!” berseroeh ia. „Dengen tjara bagimana soepo soeda bisa melolosken diri?'
„Nanti sadja akoe tjeritaiken djika kaoe poenja ajah soeda dateng” saoet Tan Ko Wie.
Tida lama kamoedian Tan Hoe Yoe poen soeda balik kombali ka dalem itoe kamar boekoe, jang persilahken Tan Ko Wie berdoedoek. Sasoedanja semoea orang berdoedoek, Tan Ko Wie lantas toetoerken apa Jang ig soeda berboeat di iboe kota provincie, satoe per satoe dengen terang. Sapandjang waktoe, mendengerin Tan Kie Hou berdjingkrak-djingkrak sembari menepok tangan dengen oendjoek kagirangannja, hingga sang ajah perloe delikin matanja boeat melarang sang anak berlakoe begitoe roepa.
„Entjek tentoe kiraken dengen sasoenggoenja akoe bernama Tan Ko Wie, kata Boe Beng, Hiap Kek, „tapi sabetoelnja, akoe boekan she Tan, hanja she Kam dan bernama Eng Boe. akoe poenja goeroe diseboet Tiatkwan Lodjin, kapala dari tjabang ilmoe silat Boe le, maka akoe harep sadja entjek soeka ma'afken atas akoe poenja perboeatan jang dalem sabegitoe lamanja akoe tilah menjesatken, pada kaoe. Salaennja itoe, idjinkenlah akoe perkenalken akoe, poenja istri, Boen Bie Kie, poetrinja Boen LianSeng.
Berkata sampe di sini, Kam Eng Boe alias Tan Ko Wie atawa Boe Beng Hiap Kek menepok tangannja tiga kali ka djoeroesan genteng roemah, dan ampir dalem sa'at itoe djoega berlompat toeroen tiga bajangan item sabagi djoega daon daon kering jang djatoh ka moeka boemi, kaloe tida sengadja memperhatiken tida nanti bisa, kadengeran soearanja. Tatkala itoe tiga bajangaq soeda masoek ka dalem itoe kamar boekoe, di bawah penerangannja lampoe, Tan Hoe Yoe mendapet kanjatahan satoe di antaranja ada prampoean moeda jang eilok, dan doea jang laennja ada orang-orang lelaki jang kira beroemoer ampatpoeloeh taon lebih; semoeanja mengoendjoek sikep gagah tapi sopan dan manis. Kam Eng Boe menoendjoek pada itoe prampoean moeda sembari berkata: „Inilah akoe poenja istri, Boen Bie Kie ini entjek Tan Hoe Yoe, mari kasi hormat pada ini entjek jang berhati baek.”
Boen Bie Kie memberi hormat pada Tan Hoe Yoe sebagimana lajiknja. Kamoedian Kam Eng Boe perkenalken djoega itae doea lelaki jang laennja, ternjata ada Ong Hoei Lim dan Ong Hoei Som, pendoedoek Hong-boe-hio, jang pembatja ini Goedang Tjerita soeda kenal. Iaorang poen membri hormat pada Tau Hoe Yoe dan dibales sebagimana paniesnja. Tan Hoe Yoe ingin oendang iaorang makan minoem doeloe, tapi Kam Eng Boe menoelak. Achirnja ia kasi taoe prihal niatannja Tan Kie Hou jang ingin bladjar ilmoe silat padanja, kaloe Tan Hoe Yoe setoedjoe, itoe anak moesti mengikoet padanja ka Hong-boe-hio sekarang djoega, tapi kaloe tida iaorangmaoe lantes brangkat pergi.
Tan Hoe Yoe damiken itoe oeroesan sama istrinja, dan Tan Kie Hou mengieng tida brentinja maoe mengikoet djoega pada Kam Eng Boe, hingga achirnja sang iboe dan ajah djadi kawalahan dan perkenanken poetranja pergi, sebab ia orang inget bahoea Tan Kie Hou poenja djiwa toch asalnja telah disamboeng oleh Kam Eng Boe, masalah sama saorang jang seperti ianja marika tida bisa pertjajaken itoe anak jang tjoema satoe satoenja?
Itoe malem djoega dengen dibekelin banjak pakean dan oewang Tan Kie Hou brangkat mengikoet pada Kam Eng Boe, istrinja Boen Bie Kie, dan itoe kadoea soedara Ong, pergi ka Hong-boe-hio, dimanaia biadjar ilmoe silat pada Kam Eng Boe alias Boe BengHiap Kek.
T A M A T.