– 10 –
mengadep di medan prang boeat bertanding pada moesoenja !) ia poenja tangan kiri sembari pegang itoe tjiam-madat, laloe boeka tjepoek madat ; pada itoe waktoe ia ada sanget katagian tjandoe, peroetnja merasa moeles, dari mata dan idoeng melele aer ; satoe pemadatan, jang sedeng ketagian opium ada sebagi locomotief jang tida ada stoomnja. Ia kira didalem itoe tjepoek masi ada madatnja, maka ia laloe keroek-keroek, tapi tida djoega ia liat itoe madat nempel dimana tjiam-madat.
„Bangsat !” memaki itoe pemadatan dengen merasa sanget mendongkol di hati, dan ia laloe ambil itoe tjepoek aken liat di sinarnja itoe hoenteng.
„Astaga ! madatnja soeda abis!” berseroe poelah itoe pemadatan jang laloe kaokkin anak prampoeannja, „Manis ! Manis! lekas bawain goea kopi !”
Si Manis jang denger ajahnja minta kopi, laloe boeroe-boeroe bawain.
Itoe pemadatan kerik-kerik di bagian sebla dalem dari tjangklongnja ; dengen berboeat begini ia djadi dapet itoe djitjeng dan kemoedian ia taro diatas kertas. Ia laloe giles-giles dengen djeridjinja, soepaja itoe djitjeng jang masi blontoran bisa djadi aloes.
Sasoedanja berboeat begitoe, ia lantes tjampoer dengen kopi dan kemoedian si pemadatan iroep itoe kopi sampe kering, tapi ia masi blon merasa poeas, maka ia laloe pake badjoe minta doeit pada anak prampoeannja boeat bli madat.
„Brapa Asoek maoe pake ?” tanja si Boto.
„Barang tiga perak keh !”
„Engga ada doeit begitoe banjak, Soek !”
„Brapa doeit loe ada sekarang ?”
„Tjoema toedjoe poeloe lima cent, Soek !”
