― 11 ―
„Kasi goea dah itoe doeit semoea, sebab goea maoe bli madat !”
Si Boto laloe ambil semoewa wang pendapetan pendjoealan kopi jang datengnja dengen satoe cent doewa cent dan dengen amat soesa bisa di koempoel sampe djadi itoe djoembla-an wang jang terseboet di atas, wang jang mana sekarang misti di serahken pada ajahnja boeat di bakar depan pelita.
Itoe pemadatan laloe berdjalan menoedjoe ka Kongsie Besar (tempat djoeal madat doeloe di Kongsie Besar, tapi sekarang soeda pinda ka Petekoan.) dan laloe bli madat tiga mata.
Setelah meliat ajahnja pergi, si Boto laloe berkata pada 'ntjinja: „Tji! tji ! kaloe begini djalannja bagimana nanti djadinja, oewang pendjoealan kopi saban hari habis di poekang oleh Memeh dan Asoek. Dimana kita bisa berdagang teroes, barang ada di djoeal, tida ada di bli lagi ?”
„Ja, To, trima sadja kita poenja proentoengan jang djelek, kaloe orang toea kita ada berdjalan sala, sekedar kita bisa kasi inget, boeat larang dengen keras ini tentoe kita tida bisa !”
„Orang soeka bilang : „IDOEP DI DOENIA SEPERTI DI SEKSA” ini perkatahan ada betoel sekali, kita berdoea ada bergiat tjari keoentoengan, tapi oewangnja abis di boeat maen kartoe dan isep madat. Bagimana nanti djadinja kita poenja diri boeat di kamoedian hari, ini tida ada orang jang bisa ramalken !”
„Ach ! soedalah loe bikin goea kesel sadja !”
„Sabentar memeh tentoe dia maoe minta doeit lagi !”
„Betoellah loe masi bodo, kita orang moeda tida soesa boeat mentjari pengidoepan, kaloe ada anak-anak moeda jang liwat, sekali goea melirik dan bersenjoem, tentoe dia
