― 12 ―
nanti dateng kamari, djika ia minoem kopi dan dahar koewee goea nanti reken doea kali lebi mahal !”
„Perboeatan edan ! orang jang dateng blandja, kaloe ada niatan boeat dapetken 'ntji poenja diri soeda tentoe ia bajar sadja sebrapa jang 'ntji bilang. Tapi orang jang sebar bibit, tentoelah di kemoedian hari ia maoe harep boeat dapet boeahnja. Djika 'ntji berboeat begitoe pada itoe orang-orang moeda, apatah marika tida nanti djadi riboet dan berklai satoe sama laen, lantaran ia orang merasa mengiri dan tjemboeroean ?”
„Perdoeli apa pada ia orang, asal sadja kantong kita kentjeng, kan memeh djadi senang, dan Asoek bisa isep madat dengen laloeasa ?”
„Kliroe ! kliroe !”
„Diam ! Diam !” berseroe si Manis jang mendapet liat ada satoe anak moeda lagi mendatengin dan ia laloe melirik ka itoe djoeroesan sembari mesem-mesem.
Sebetoelnja itoe anak moeda tida ada niatan boeat minoem kopi, tapi lantaran ia dapet liat ada nona moeda jang eilok di itoe waroeng kopi, lantas tergerak ia poenja hati. Si Manis poenja lirikan ada sebagi kilap jang berkredep di moeka boemi dan bikin silo mata orang, hingga itoe anak moeda poenja kaki seperti djoega di betot setan soeda lantas mampir di itoe waroeng, sembari berkata : Kasi owee kopi ah !”
„Koh saja potongin koewee lapis legit ja ?” tanja si Manis seraja bawa satoe mangkok kopi.
Lantaran maloe hati, maka itoe Gongkongtjoe lantas berkata sadja :
„Ja”
Si Manis boekan sadja bawain koewee lapis legit, tapi ia tjampoerin djoega roepa-roepa koewee.
