– 24 –
moerid. Ini goeroe ada dapet gelaran B. A, ia ada pranakan orang Batawi djoega jang soeda pergi ka Singapore dan kemoedian ka Amerika boeat teroesken pladjaranaja.
Begitoelah adanja itoe waktoe, koetika ini tjerita telah terdjadi. Roepanja Keng Hok ada tjakap sekali, moekanja jang toapan ada setimpal dengen aer moekanja jang terang, maka itoe tida poen heran, bahoewa si Boto soeda djato tjinta padanja.
Sekarang soeda gilirannja boeat kita petaken parasnja si Boto, kerna sebegitoe lama ini tjerita soeda berdjalan, tapi pembatja masi blon dapet taoe begimana roepanja itoe nona. Moekanja si Boto potongan daon siri, pengawakannja jang ketjil molek dan kentjeng ada setimpal dengen pinggangnja jang langsing, koelit moekanja jang poeti bersi ada bertjahja seperti terangnja boelan di tanggal limablas, idoengnja jang bangir ada setimpal dengen moeloetnja jang tjomot, alisnja jang kereng ada di sertaken dengen doea bidji mata jang djeli. Djika ia mengomong, orang bisa dapet liat giginja jang poeti ada teratoer sebagi moeteara jang sama besarnja dan tertoetoep dengen bibir jang mera, apa lagi kaloe ia bersenjoem, doea soedjen jang manis ada berpeta di pipinja jang litjin. Dari djaoe sadja kaloe orang liat potongan badannja jang lemes orang lantes bisa dapet tebak, bahoewa ia ada satoe gadis jang ellok, apa lagi kaloe orang meliat doea boeah tetenja jang kentjeng, tentoelah marika poenja hati lantes djadi tergioer.
Prampoean jang eilok seperti si Boto ada sebagi ratjoen di matanja anak-anak moeda, begitoe boeat dirinja si nona itoe ada gampang sekali djadi tersesat, baek djoega ia ada poenja kebedjikan, hingga ia bisa bawa dirinja aken dapetken kesenangan doenia jang sedjati!
Sekarang kita rasa soeda sampe tjoekoep boeat pembatja dapet taoe dari hal itoe doea orang moeda, baeklah kita
