-34-
terkenal paling sopan; [1] Sering-sering ia tondjolken kepalanja diloear pintoe sembari mesem-mesem pada anak-anak moeda jang berdjalan liwat disitoe, kalakoean mana menerbitken di dalem pikirannja itoe anak-anak moeda doerhaka satoe niatan djahat aken bawa lari itoe anak gadis.[2]
Baek djoega djodonja itoe gadis genit ada enteng, kerna di itoe waktoe 'ntjek Hwa Hin telah dateng melamar, lamaran mana di trima baek, hingga ia orang soeda djadi soewami istri, djika tida, kita blon taoe, begimana nanti djadi dengen itoe gadis jang galak!
Pertama kali si Ros tida soeka pada soewaminja, kerna ia ingin kawin sama baba pranakan Betawi djoega; omongannja 'ntjek Hoa Hin, jang seperti bejo mengotjrok kakahkeke, sebab ia tida begitoe pande bitjara Melajoe, soeda membikin ia tida bisa merasa tjinta pada itoe soewami, [3]
Aken tetapi lantaran tidoer didalem satoe pembaringan, pengaroe natuur soeda bikin bergerak djoega ia poenja hati;
- ↑ Di itoe masa gadis-gadis Tionghoa ada di larang keras sekali boeat berdiri diloear pintoe, djika ada gadis jang brani toendjoekin moekanja dengen menongol di depan pintoe, orang lantes kata, jang ia ada satoe anak prawan jang genit, hingga gadis-gadis toeroenan orang baek-baek, terlaloe soesa sekali orang bisa dapet liat! Tetapi sebagimana oedjarnja nabi Kong Hoe Tjoe ada bilang: „DJIT DJIT SIN, JOE DJIT SIN, KONG KO WHAT TJIOK SIN BIN.“ begitoelah itoe adat-istiadat koeno, soeda djadi beroba djaoe !
- ↑ Inilah ada satoe nasehat baek boeat anak-anak gadis dan orang-orang prampoean moeda, jang bertingka lakoe genit, aken roba adatnja, soepaja tiada terbit keonaran.
- ↑ Pengrasahan tjinta boekan sadja bisa dateng dari roepa jang tjakap, tapi omongan jang manis dan priboedi jang baek bisa menbikin ketarik orang poenja hati, maka itoe poen tiada heran, bahoewa si Ros sekali-kali tida bisa menaro tjinta pada soewaminja jang tingka lakoenja seperti satoe bantong
