-35-
[1]ia pikir barangkali Toean Allah Jang Maha Koewasa soeda djodoken dan takdirken, bahoewa ia moesti manika pada ’ntjek Hwa Hin, maka itoe ia soeda djalanken kewadjibannja sebagi satoe istri misti berboeat : ia merawattin dan oeroes roema tangga dengen betoel.
Entjek Hwa Hin, jang telah dapet istri eilok, hatinja djadi sanget bersoekoer; maski ia soeda keloearken oewang Nope-toen boeat mas kawin poen ia tida marasa menjesel; rawattan jang baek dari si Ros soeda membikin ia djadi lebi bergiat boeat mentjari wang, soepaja ia bisa bliken pakean boeat kasi pake pada ia poenja istri jang tertjinta.[2]
Tetapi kesenangan doenia tiada bisa berdjalan lama : baroe sadja ia orang idoep manis sebagi laki istri doewa taon lamanja, lanteslah dateng setan penggoda, jang membikin keadaän jang baek mendjadi beroba dan meroesaken orang poenja pengidoepan jang broentoeng, sebagi pembatja nanti menjataken di bawa ini.
Dengen terepot repot itoe iboe pementopan soeda dateng keroemanja ia poenja anak prampoean.
„Ada kabar apa, memeh?” tanja sang anak jang meliat roepanja ia poenja iboe dateng dengen tersanga-sanga.
„Goea perloe minta loe poenja pertoeloengan!” berbisik toe iboe pementopan di koepingnja ia poenja anak prampoean, soepaja ia poenja mantoe lelaki tida denger itoe pembitjarahan.
„Apa memeh perloe pake doeit ?”
