— 38 —
tjoete-idoeng-poeti, si Ros lantes menanja: „Apa ito 'ngko. ada bininja?”
„Bininja sih ada tapi tida tinggal di sitoe!' sahoet itoe iboe doerhaka dengen memboeta.
„Ros maloe dong masoek ka roemanja !”
„Engga. goea tida adjak loe pergi ka roemanja, tapi kita pergi di roemanja si Isah, dia nanti panggilin itoe anak moeda!” Itoe doea prampoean laloe masoek di roemanja si Isah.
Setelah si Ros soeda masoek, ia meliat didalem itoe roema ada begitoe banjak orang maen kartoe; boeloe badannja djadi berdiri dan merasa mengkirik, koetika ia dapet liat orang-orang semoewa lagi borosken oewang di atas tiker.
„Doedoek njonja, doedoek nona, saia nanti pergi panggil itoe baba!” kata si Isah jang silaken itoe doewa tetamoenja doedoek di satoe tempat jang berpisa dengen itoe kawanan pementopan.
Kemoedian si Isah laloe panggil itoe tjoete-idoeng-poeti.
Itoe menoesia kedji sanget girang koetika ia dapet taoe jang itoe nona manis soeda dateng, dan laloe pergi ketemoeken itoe prampoean moeda, jang tiada nanti bisa kloear dari itoe roemah, seblonnja mendjadi korban boeat poeasken napsoenja dari itoe anak moeda doerhaka.
„Ini anak prampoean saia, Ba !” kata itoe iboe pementopan, sembari toendjoek pada anakuja.
„Apa ini Enso ada anaknja 'ntjim jang djadi istrinja 'ntjek Hwa Hin di Gang Terate?” kata itoe menoesia kedji sembari lirik pada si Ros.
Parasnja si Ros jang tjantik soeda mengobarken api birahinja, hingga ia soeda djadi sanget bernapsoe boeat dapetken istri orang dengen zonder pikir panjang, bahoewa boeat itoe perboeatan kedji di blakang hari ia misti dapet hoekoemannja.
