— 39 —
„Betoel Koh!” menjaoet si Ros dengen maloe-maloe.
„Lantaran 'ntjim tida bisa bajar-bajar ia poenja oetang dari itoe owee merasa slempang, maka owee minta Enso tanggoengin, Enso teeken adja diatas ini soerat oetang ?" kata itoe tjoete-idoeng-poeti, sembari seraken selembar kertas di tangannja si Ros.
„Ni penanja Na!” kata si Isah jang telah sediaken pena.
Si Ros laloe samboetin itoe pena dan teeken tapakdjarak, maskipoen ia tida taoe brapa besarnja itoe soerat oetang ada tertoelis.
„Koh saia minta tempo doeloe boeat bajar itoe oetang, nanti kaloe saia poenja soewami ada oewang, tentoe saia bajar!” kata si Ros dengen roepa seperti orang maoe minta di kesianin!
„Boleh Enso, engga kenapa kaloe Enso bajar sedikit lama!” kata itoe tjoete-idoeng-poeti, dengen tjengar tjengir dan maen-maenken matanja.
Si Ros jang meliat kelakoeannja itoe anak moeda, lantes doega, bahoewa itoe anak moeda ada beridoeng poeti, hatinja jang ada terpendem napsoe birahi jang amat besar poen djadi bergerak sedikit, koetika meliat itoe anak moeda ada begitoe tjakap dan berpakean netjis.
Ach dasar iboe jang doerhaka dialah jang terbitken ini keonaran !
Samantara lamanja itoe doea orang moeda ada berdoedoek diam sembari maen pandang-pandangan, sedeng sang iboe jang temaha wang poen tida bikin kebratan soeatoe apa, malahan ia berharep, kaloe-kaloe roepa jang manis dari ia poenja anak piampoean nanti menarik hatinja itoe djedjaka kaja, pada siapa ia ada beroetang begitoe banjak wang.
Djika itoe orang moeda djato tjinta pada si Ros, boekan sadja ia terlepas dari itoo peroetangan jang besar, tetapi
