- 55 -
itoe gang tida ditaroken penerangan gas; betoel ada djoega. lentera minjak jang apinja kelak kelik, tapi ini penerangan tida sampe tjoekoep terang.
Koetika itoe tjoetee-idoeng-poeti berdjalan di tempat jang sedikit gelap, itoe roejoeng lantes djato di atas kapalanja dengen keras, hingga telah terdenger soewaranja: „Tak!”
„Adoe !” mendjerit itoe tjoetee-idoeng-poeti jang lantes reba di atas tanah dengen mandi dara.
Lantaran di itoe gang ada sanget soenji, hingga orang- orang jang tinggal di sitoe tida dapet taoe, apa jang soeda kedjadian, dan itoe djahanam djadi tinggal menggletak di atas tanah dengen pangsan, samentara itoe boeaja darat laloe melariken diri, pergi menoedjoe ka Kongsi Besar.
Disitoe ia ketemoe poelah pada ‘ntjek Hwa Hin jang lagi menoenggoe datengnja itoe boeaja darat.
„Bagimana ?” tanja temennja ‘ntjek Hwa Hin.
„Soeda beres, mana oepanja !” kata itoe boeaja darat, sembari tada tangan.
Entjek Hwa Hin merasa sanget girang, bahoewa ia soeda bisa bales sakit hatinja pada itoe orang lelaki jang maen gila pada ia poenja istri, maka ia laloe keloearken oewang sepoeloe roepia dan kasiken pada itoe boeaja.
„Sekarang apa nji masi maoe piara itoe prampoean hina?” tanja ia poenja temen.
„Abis begimana ngai bisa oesir padanja, kerna ia ada ngai poenja bini kawin!”
„Maski betoel ia ada djadi nji poenja bini kawin, tapi ia soeda berhati serong, djika ini sekali nji kasi ampoen, laen kali ia nanti bikin lagi itoe perboeatan boesoek, tapi boekan sadja begitoe, boleh djadi djoega nji poenja djiwa nanti djadi binasa, lantaran dia nanti adoe nji berklai sama ia poenja ketjintahan.
