- 56 -
„Ja nji kata si betoel djoega, baek sekarang djoega ngai oesir padanja !”
Itoe doea orang lantes brangkat poelang ka ia orang poenja roema, samantara ‘ntjek Hwa Hin poenja istri lagi menoenggoe poelangnja ia poenja soawami di depan pintoe.
Hatinja si Ros telah mendjadi kwatir, kerna ia tida taoe, apa lantarannja jang ia poenja soewami soeda pergi keloear; di itoe waktoe ia baroe merasa menjesel, jang ia soeda toeroetin sadja keinginannja ia poenja iboe, apa lagi ia telah meliat, roepanja ia poenja ketjintahan di dalem pertemoean jang kedoewa seperti orang jang koerang menjinta lagi inilah tida membri harepan banjak boeat ia toempangin diri, djika ia poenja soewami tjerein padanja.
„Eh, prampoean gladak boeat apa lagi loe toenggoe pintoe, goea poenja roema tida maoe simpen orang boesoek, sekarang djoega loe misti pergi, goea engga soeka liat lagi loe poenja roepa. Loe bole ikoet iboe loe; dia boleh djadi makelaar boeat djoeal loe poenja diri!” kata sang soewami dengen goesar.
„Ja Hin, goea engga ada sala apa-apa; kenapa loe maoe oesir sama goea !” kata sang istri sembari meratap.
„Kaloe loe engga ada poenja sala, masa goea oesir, goea soeda dapet taoe, dimana loe soeda di djoeal. Toetoep moeloet loe, dan lekas laloe, dari sini, prampoean jahat! Ja, loe soeda bosen si sama goea.”
„Boekan goea poenja sala; tapi loe prampoean goblok soeda kasi sadja diriloe di djoeal oleh ini prampoean toea doerhaka!” kata Entjek Hwa Hin, sembari toeding-toeding pada ia poenja mertoea prampoean.
Itoe mertoea gladak lantaran soeda berboeat sala, maka ia tinggal diam sadja dirinja di tjatji begitoe matjem.
