— 66 —
Sian Lie (dewa prampoean). Soesa sekali dapet satoe prampoean seperti dia! Laen-laen prampoean kaloe liat goea poenja deeleman band karet bikinan Fuchs dan koeda Sandelhout, ia orang lantes djadi tergioer! Tapi ini sekali maskipoen goea ada pake badjoe linnen bikinan Oger Freres dan topi vilt dari M. de Koning, goewa poenja roepa masi blon bisa menarik hatinja! Heran, soenggoe heran!” begitoelah berpikir itoe anak moeda jang soeda djadi lebi bernapsoe boeat dapetken si Ros.
Deelemannja soeda meliwatin si Ros poenja sado, maka ia laloe soeroe koesirnja djalan plahan sekali, soepaja bisa menoenggoe sadonja si Ros liwat.
„Toekang sado, toetoep ah loe poenja tenda blakang!” kata si Ros jang maoe bikin lebi panas lagi hatinja itoe anak moeda.
Itoe sado lantas di kasi brenti di pinggir djalanan, dan itoe toekang sado laloe toeroen pergi di blakang sado aken toetoep itoe tenda blakang, jang tadinja ada tergoeloeng.
„Ajo da, lariken koeda loe. lekasan, kan maloe, orang liatin !” kata poelah si Ros, koetika ia liat itoe toekang sado soeda doedoek kombali.
„Tér! tér! tér !” berboenji itoe petjoet. jang menjabet pada itoe koeda boeat bikin itoe binatang lari lebi keras.
Itoe anak moeda telah dapet denger terang, apa jang si Ros berkata pada itoe toekang sado, tetapi boekannja ia mendjadi goesar, malahan hatinja djadi semingkin tergioer.
Ah! ini soeda memang adatnja doenia: barang jang soesa orang dapetken, semingkin besar keinginan orang boeat mendjadi kapoenjaännja !
Itoe sado soeda di kasi brenti depan pintoenja Entjek Asie, komedian si Ros bajar setenga roepia dan laloe masoek ka roemanja.
