- 9 -
toeloeng pengoeroes Haktong sadja toeloeng kasiken itae oewang di tangan loe!"
,,Ach! engga perloe 'ngko kirimin oewang blandja, biar saja disini tjari sendiri. Baekan 'ngko poempoelin sadja itoe oewang di tangan 'ngko sendiri !"
,,Ja betoel sekarang loe tida perloe pake, tapi toch kita blon bisa dapet taoe, kaloe di dalem satoe waktoe loe perloe pake oewang maka goea maoe kasi loe sepoeloe roepia saban boelan."
,,Ja, tetapi engko moesti kira-kira, soepaja engko sendiri tida djadi kekoerangan oewang!"
,,Goea taoe To; brapa jang goea moesti pake saban boelan!',
Maskipoen ini doea orang moeda ada menjataken ia orang poenja ketjintahan hati, tapi blon perna sekali marika ada berboeat satoe kelakoean jang tida sopan, kerna itoe ketjintahan ada dengen hati jang soetji dan djoega dari lantaran ia orang soeda lama galang-goeloeng satoe sama laen, membikin marika tida ada niatan jang djelek.
,,To, boeat membri slamat tinggal, goea maoe minta satoe tjioem dari loe!" kata si Keng Hok dengen pelahan.
Tetapi si Boto tida mendjawab, hanja ia tjoema melirik dengen sorot mata jang ada mengandoeng ketjintahan jang besar, hingga membikin itoe anak moeda dapet taoe, bahoewa si Boto tentoe tida nanti tampik ia poenja permintahan.
Dengen sabar ia laloe berdiri lebi deket, dan dengen plahan ia memelok lehernja si Boto, kemoedian ia baroe tjioem pipinja itoe Nona manis, tetapi di itoe saät djoega ia poenja napsoe telah djadi timboel dan pikirannja jang terang poen telah djadi tertoetoep dengen mega-mega item, baek djoega ia poenja hati jang soetji soeda bisa laloeken itoe niatan jang djelek dan ia lantas lepas ia poenja pelokan
