— 37 —
„Di gang Semoet!”
Selagi itoe doea orang mengobrol, satoe prampoean toea laen soeda dateng dan betot tangan 'ntjim Asie, seraja berkata: „Ajo Nja, kita maen ketjil-ketjil adja?”
„Lowak brapa toewatji ?” tanja Entjim Asie.
„Lowak setenga perak, semata sepeser !” kata itoe prampoean toea, jang laloe silaken Entjim Asie doedoek diatas tiker.
„Kita maen lowak satoe adja !” kata poelah Entjim Asie, jang merasa itoe pemaenan ada terlaloe ketjil, sebab didalem kantongnja ada oewang doea poeloe lima roepia.
„Maen iseng-iseng adja, kan ini boentoet boelan, kaloe besok soeda trima gadji boleh maen besar-besar !” kata sala satoe prampoean jang doedoek di itoe tiker djoega.
„Pan si harepin gadji, orang engga kerdja dimana bisa dapet gadji ?” tanja Entjim Asie, jang blon mengarti omongannja ia poenja temen maen.
„Kan gadji saja poenja laki, jang saja harepin!”
„Ajo da lekasan maen, kartoe soeda sedia !” kata poelah satoe prampoean jang tangannja soeda gatel.
„Ja! Ja, ajo kita kiat !” kata Entjim Asie, jang laloe ambil setoemploekan kartoe dan kasi toendjoek pada temen-temennja, sembari teroesken omongannja: „Lauwtjian ni, ja!”
„Ja, toewatji tentoe jang tarik doeloean !” Ini doegahan ada tjotjok, kerna laen-laen pementopan telah tarik kartoe djelek-djelek.
Sasoedanja itoe kartoe di beresken kombali, Entjim Asie lantes tarik delapan kartoe, dan kemoedian ia sorong itoe praoe kartoe (kertas tebel boeat tatakkan kartoe) pada temennja, jang doedoek di sebla kiri, jang laloe ambil toedjoe kartoe, kemoedian ia seraken poelah pada temennja jang laen, dengen berganti-ganti tarik kartoe, hingga semoea pementop djadi masing-masing ada pegang kartoe di tangannja.
