- 41 -
pementopan ka itoe sarang djoedi jang laloe doedoek di atas tiker.
„Maen brapa ni? Baekan maen lowak seperak, samata satoe cent!” kata satoe prampoean moeda, sembari kotjok-kotjok kartoe.
„Engga djangan maen besar-besar, goea poenja laki blon kasi doeit !” kata poelah satoe prampoean toewa!
„Masa soeda gadjian blon di kasi doeit, tentoe Entjim poenja laki ada piara prampoean di loearan !” sahoet itoe prampoean moeda.
„Goea boekan moeda seperti loe, goea perdoeli apa dia piara prampoean, asal dia kasi goea oewang blandja tjoekoep soepaja bisa maen kartoe saban hari !”
„Eh orang poenja laki boekan maoe doeitnja adja dong, orangnja djoega engga maoe di kasi laen prampoean poenjain, dong !”
„O! enak betoel omongan prampoean moeda !”
„Boekan begitoe Tjim, laki saja takoet sekali pada saja, apa jang saja maoe tentoe dia toeroetin, Entjim taoe, apa sebabnja ?”
„Tiada ada laen sebabnja, tentoe djoega loe soeda kong tauwin!” kata itoe Entjim toea, jang soeda djadi panas pada itoe prampoean moeda.
„Sala Tjim, Tjim taoe, saban pagi, kaloe dia maoe pergi kerdja, saja tjioem doeloe dan pada waktoe sore dia poelang kerdja saia poen samboet padanja dengen satoe tjioeman dan lantaran saia tjioemin adja dia poen djadi tjinta pada saia !”
„Hm! masa si ada bini jang brani tjioem lakinja !”
„Kenapa takoet, dia ko soeka tjioem kita, kenapa kita engga bole bales menjioem padanja ?”
„Oeda! sama goea orang toea loe djangan omongin jang begitoean goea engga soeka denger!”
