- 45 -
,,Apa mengartinja loe poenja perkatahan?"
,,Begini Nja, Njonja boleh keteng satoe persatoe Njonja poenja anak prampoean, dari itoe wang jang Njonja nanti dapet dari tiga anak prampoean itoe sadja njonja bisa maen sepoeas-poeasnja, dan Njonja engga bisa kekoerangan doeit."
,,Abis bagimana goea moesti bikin?"
,,Begini, lebi doeloe njonja moesti djalanin njonja poenja anak prampoean jang kedoea, kemoedian jang ka tiga, dan blakangan jang ka ampat. Betoel sala, nona Ros tida maoe njarepet-njarepet, kan boleh dapet banjak oewang !"
,,Abis loe maoe atoer bagimana sama si Seroni, soepaja goea boleh dapet doeit?"
,,Begini Nja, Njonja adjak ia kamari, nanti saja panggil itoe Baba di Toko Tiga; memang ia ada pesen saja boeat tjari-in prampoean baek-baek."
,,Brapa dia maoe kasi?"
,,Lima poeloe atawa seratoes roepia djoega dia bajar."
,,Kaloe begitoe, baeklah goea nanti adjak dia dateng kamari."
,,Kapan Njonja bisa adjak njonja poenja anak?"
,,Besok ke."
,,Djadi blon tentoe ni?"
Dimana goea bisa tentoein, nanti sadja kaloe goea soeda adjak dia kamari baroe loe panggil itoe Baba ?"
,,Begitoe ja baek, asal adja njonja djangan lama-lama."
Sasoedanja selese berdami itoe iboe doerhaka laloe brangkat poelang ka roemanja.
Baeklah sekarang kita adjak pembatja moendoer doeloe boeat bebrapa minggoe dari ini tjerita, aken meliat pada si Seroni dan soewaminja, sianseng Tiong Djin jang tinggal di Patoeakan.
