– 46 –
Sedari si Seroni menika sama itoe Sianseng, ia orang ada idoep roekoen satoe sama laen, hingga marika merasa sanget broentoeng sebagi ia orang ada idoep di dalem Sorga.
Lantaran si Seroni poenja roepa tida begitoe tjantik dan koelit moekanja item manis, hingga membikin ia tida begitoe olo-olo pada soewaminja, dan ia trima sadja peroentoengannja boeat djadi istrinja Entjek Tiong Djin.
Pada soewaktoe hari, sakoenjoeng-koenjoeng itoe Sianseng dapet denger jang twaienja telah bertjere dan soeda ikoet orang lagi, ini kabar telah membikin ia djadi heran dan boeat pikiran, kerna ia taoe betoel, jang Entjek Hwa Hin ada saorang baek dan sabar. Ia soeda dapet doega, barangkali djoega ini bertjerehan telah terdjadi lantaran gara-garanja ia poenja mertoea prampoean, si pementopan, tetapi ia tida brani djelekin orang poenja nama dengen sembarangan, dan soeda bebrapa kali ia tanja istrinja boeat tjari taoe apa sebabnja, maka si Ros soeda bertjere dari ia poenja soewami, tapi pertjoema sadja sebab sang istri tida bisa kasi ketrangan jang tjoekoep, kerna ia blon ketemoe pada Entjinja, barangkali djoega ia telah dapet taoe resia keboesoekannja ia poenja Entji, tapi ia maoe toetoep rapet-rapet resia itoe.
Apa maoe Entjek Hwa Hin kebetoelan liwat di Patoeakan, maka ia laloe di panggil oleh sianseng Tiong Djin dan di adjak doedoek boeat beromong-omong.
„Doedoeklah doeloe Toathio!” kata sianseng Tiong Djin pada bekas iparnja.[1]
„Toathio, owee maoe tanja, kenapa Toathio soeda bertjere sama Toewa ie Ros?” kata poelah sianseng Tiong Djin sesoedanja tetamoenja telah berdoedoek.
- ↑ Maskipoen Si Ros soeda bertjere sianseng Tiong Djin jang beradat sopan tiada bisa balik itoe panggilan sebagimana doeloe pada bekas iparnja.
