- 56 -
,,Apa Nona Manis tinggal disini ?"
,,Betoel Bi!"
,,Jang mana satoe ?" menanja Embok Saleha, kerna ia meliat di dalem itoe roema ada doea gadis.
,,Toe jang lagi njapoe!"
,,Embok Saleha laloe pandang dengen terliti pada itoe gadis jang di toendjoeken dan ia dapet liat betoel, balioewa itoe Nona jang lagi njapoe ada poenja tai laler di tenga djanggoetnja.
,,Apa si Nona Manis blon ada toendangannja?" tanja Embok Saleha dengen swara plahan.
,,Blon, Bok!" menjaoet itoe iboe jang lantes dapet doegahan, bahoewa Embok Saleha dateng di roemanja hendak melamar si Manis.
,,Djangan goesar, Nja, apa kiranja Njonja engga ada kebratan, seandenja ada Baba-Baba jang maoe minta Njonja poenja anak boeat djadi bini moeda ?"
,,Kaloe ada jang maoe piara dengen betoel si masa saia engga kasi, sebab piara anak prampoean, seperti taro telor di atas oedjoeng tandoek, kaloe soeda besar kita engga kasi kawin boeroe-boeroe boleh-boleh nanti djadi kepiran!" sahoet itoe iboe doerhaka, jang ingin menarik hasil dari ia poenja anak prampoean.
,,Betoel Nja! saia djoega engga brani boeat lamarin anak prawan orang, kaloe itoe Baba tida maoe piara teroes, tetapi ini Baba jang penoedjoe pada nona Manis, dia ada anaknja orang kaja besar jang ada poenja banjak roema-roema jang di kasi sewa. Orangnja si baek engga pembosenan, kaloe nona Manis djadi di piara, Njonja djangan slempang lagi boeat Njonja poenia pengidoepan, dan djoega Nona Manis poen tentoe di bli-in barang-barang mas inten jang berharga besar-besar!"
