— 76 —
ia laloe kasi taoe, jang Baron Lim maoe bli-in pantek koende inten harga doea ratoes roepia.
,,Baek nanti goea tjari !" kata itoe iboe doerhaka dengen hati jang sanget girang, kerna ia pikir jang ini ada satoe djalan boeat dia bisa dapet banjak barang mas inten dengen pake namanja itoe anak moeda jang soeroe tjari, tentoe tjengkauw-tjengkauw nanti pertjaia padanja dan kasi ia bawa barang-barang mas inten, kerna ia dapet ingetan boeat gade orang-orang poenja barang mas inten jang ada di tangannja, soepaja saban hari ia ada sedia wang boeat pergi maen top.
Ia lantas pergi pada tjengkauw-tjengkauw boeat soeroe tjari itoe pantek koende jang harga f 200:― dan siarken djoega tjerita djoesta dengen membilang jang Baron Lim maoe bli segala roepa barang-barang mas inten boeat kasi ia poenja anak prampoean jang djadi djingenja itoe anak moeda.
Semoewa tjengkauw-tjengkauw lantas pertjaja itoe omongan, dan laloe kasi itoe barang-barang di tangannja itoe prampoean pementopan boeat kasi toendjoek pada itoe Baron; ada djoega jang koerang pertjaja padanja soeda ikoet sendiri pergi ka roemanja si Manis.
Koetika satoe tjengkauw dateng ka Gang Tjaijho, apa maoe kebetoelan di itoe waktoe Baron Lim ada di sitoe, dan si Manis lantas loendjoekin itoe barang-barang pada Babanja sembari berkata: „Ini pantek koende bagoes ja Koh, Bli-in dong ini barang boeat saja pake."
,,Baek Engko nanti bli itoe barang, kaloe harganja pantes!" kata Baron Lim jang laloe pegang itoe pantek koende, dan liat itoe barang boeat sementara waktoe.
,,Koh, ini giwang djoega bagoes, Manis blon ada poenja giwang, bli-in dong lagi boeat saja !" kata itoe djinge, setelah itoe tjengkauw kasi liat satoe pasang giwang.
