— 77 —
„Brapa harganja?”
„Tjoema tiga ratoes roepiah!”
„Apa intennja paot engga?”
„Tjoba Koh liat adja, Manis engga begitoe mengarti dari perkara inten!”
„Tjoba Nona pake, Engko maoe liat, kaloe pantes Engko bli-in!”
Si Manis lantas sadja boeroe-boeroe boeka oelirnja itoe giwang dan kasi masoek di lobang koepingnja dan kemoedian ia laloe kasi masoek lagi oelirnja itoe giwang soepaja tida djadi djato, dan lantas ia berkata: „Pantes, engga Koh?”
„Intennja terlaloe ketjil si dimana bisa keliatan njata, tjoba mari deketan!” kata Baron Lim jang berlaga seperti orang jang maoe liat itoe barang dengen njata.
Si Manis laloe deketin babanja.
Lantaran ia ada pake itoe barang permata, soeda membikin parasnja djadi lebi eilok lagi, hingga bikin timboel api birahinja itoe Baron, jang lantas tjioem pipinja si Manis.
Itoe tjengkauw merasa djenga, meliat kelakoeannja itoe anak moeda, tetapi apa maoe di kata, kerna si Manis boekan satoe bini kawin, tapi satoe penghiboer hati, maka itoe Baron tida pegang adat-istiadat jang pantes.
„Djadi engga Koh ?”.
„Bli da, nah ni doeitnja !” kata Baron Lim, jang lantas kasi keloear lima lembar oewang kertas dari seratoes roepia.
Lantaran si Manis soeda djadi di bli-in barang mas inten jang berharga lima ratoes roepia, maka itoe tjengkauw lantas tjeritaken di sana sini dari kerojalannja Baron Lim, hingga orang loear lantas djadi pertjaja betoel pada Emijim Asie, jang tiada berajal lagi aken goenaken itoe waktoe jang baek dan ia laloe pergi pada tjengkauw-tjengkauw dengen kata jang Baron Lim ada soeroe tjari barang ini dan itoe,
