— 78 —
padahal itoe barang ia hendak bawa di pengadean boeat djadiken oewang dan oewangnja ia maoe goenaken boeat maentop.
Kaloe ada tjengkauw-tjengkauw tanja barangnja lantaran soeda terlaloe lama di tangannja, itoe pementopan ia laloe kasi djawaban jang Baron Lim lagi soeroe taksir, kaloe harganja pantes, tentoe ia djadi bli.
Lantaran di lagoein sadja, ada djoega tjengkauw jang soeda merasa slempang bahoewa barangnja nanti djadi ilang, djika ia tinggal diam sadja, maka ia laloe menagi dengen keras, hingga Entjim Asie soeda djadi ketakoetan dan soeda pergi ambil barangnja laen tjengkauw dan itoe barang ia lantas bawa pergi lagi ka panggadean boeat teboes itoe barang jang tiada bisa di tahan lebi lama, lantaran jang poenja dagi oeber-oeber.
Begitoelah itoe prampoean pementopan gali lobang jang baroe boeat toetoep lobang jang lama, begitoe poenja begitoe, hingga barang-barang orang jang ada di tangannja semingkin hari djadi semingkin banjak, tapi itoe prampoean djahanam masi blon djoega mendapet inget, bahoewa di kemoedian hari orang nanti kasi masoek dirinja ka dalem kamar tikoes.
XI
PENGAROENJA SATOE BRIEFKAART JANG HOEROEFNJA TERTOELIS DENGEN TINTA MERA.
Doeloe kita soeda tinggalken Keng Hok, tatkala ia lagi brangkat ka Tegal, sekarang kita maoe adjak pembatja meliat lagi keadaännja kita poenja anak moeda jang bidjaksana di itoe tempat.
