- 79 -
Tatkala Keng Hok sampe di sana, ia soeda di kasi tinggal didalem roema sekola. Pada besok harinja ia laloe atoer prabot-prabot sekola boeat moelai mengadjar sasoedanja liwat Taon Baroe Tionghoa.
Bangsa Tionghoa di Tegal ada djiatsim sekali boeat pahamken hoeroef Tionghoa, maka ada banjak pendoedoek di sana jang soeda beroemoer banjak masi maoe bladjar, dan soeda oendang si Keng Hok boeat mengadjar di waktoe malem, dengen bajaran f 10:- didalem satoe boelan.
Seblonnja Keng Hok kasi pladjaran pada moerid-moerid didalem sekola, lebi doeloe ia soeda mengadjar orang loearan di waktoe malem.
Lantaran ia ada sanget pande boeat mengadjar orang. hingga namanja telah djadi terkenal oleh sekalian bangsa Tionghoa disana.
Pada waktoe harian Taon Baroe Tionghoa Keng Hok merasa sanget sepi oleh kerna orang-orang Tionghoa disana merajaken hari Taon Baroe tida begitoe rame seperti di kota Betawi.
Koetika soeda liwat Tjap-gomeh, itoe sekolahan baroe di boeka, dan ada banjak anak-anak Tionghoa jang di anter oleh marika poenja orang toea boeat di kasi masoek didalem stoe sekola.
Itoe goeroe baroe laloe toelis namanja sekalian hakseng- hakseng dan namanja ia orang poenja orang toea djoega, boeat kasi masoek didalem boekoe.
Sasoedanja itoe pakerdjahan telah djadi selese, ia laloe ambil boekoe-boekoe dan bagi-bagi pada sekalian hakseng hakseng dan atoer masing-masing poenja tempat doedoek.
Di itoe waktoe didalem itoe roewangan ada sanget brisik sekali, kerna itoe anak-anak lagi mengobrol satoe pada laen.
Keng Hok lantas kasi tanda boeat soeroe itoe semoewa
