Li Famasao
I’otarai me ifasindro Jimmy Wales ba ndröfi 2001, Wikipedia no so wa’ atedou sebua sibai. Fa’atumbu Wikipedia ba li Hagöri me döfi 2001, ba aefa da’ö itohugö ba wangehaogö Wikipedia ba gangolifa wehede tanöbö’ö ba zi sagörö uli danö, fao bada’ö wa’atumbu Wikipedia li Indonesia ba ndröfi 2003. Ba me tefasindro Wikimedia Foundation ba ndröfi 2003 da’ö idugu manuhini wa’atedou Wikipedia faoma ngawalö halöŵö nifaluania. Ba Indonesia, Wikimedia Indonesia no ifa’anö ngawalö halöŵö nituturu ba wanolo fa’atedou faoma ba wamanöi wa’asökhi Wikipedia, he ba nösi zinura simanö göi ba wa’ato zanura ma si terou tödö sedöna manura ba Wikipedia.
Sambua waö-waö lala halöŵö nifalua Wikimedia Indonesia ya’ia da’ö waöwaö lala halöŵö WikiLatih si no tefalua i’otarai me döfi si 2016. Waöwaö lala halöŵö WikiLatih sambua wamaha’ö ba wanura faoma wamulö’ö ngawalö zinura ba Wikipedia. Ba hiza, me no muhörö-hörögö wamalua waöwaö lala halöŵö da’ö, WikiLatih no lafalua molo’ö gangolifa li ma molo’ö li daerah sambua mbanua, ba hiza no tefalua ia göi sifa’ohe tanga khö wamareta, organisasi, ba simanö göi gangowuloa tanöbö’ö, ba wa’oya nasa ganofula sasese sibai lafaehagö sifakhai ba Wikipedia, he moroi ba zifao ba wamaha’ö andrö, ba he göi ya’ira sifarahu ba wamalua angowuloa andrö. Baero da’ö, ba media sosial Wikimedia Indonesia, simane Facebook, Instagram, he göi Twitter, wa’oya wanofu sifagölö.
Fanofu sasese lasofu ya’ia da’ö; hadia gamaehuta Wikimedia faoma Wikipedia, hadia tola labali’ö Wikipedia andre sitobali umbu zura, hewisa lala wanga’i umbu sifagöna ba Wikipedia, hadia manö zitola lasura ba Wikipedia, hewisa lala wangotomosi Wikipedia andrö ba li zi sambua mbanua . Da’ö yaŵa zinofu sasese sibai lafaehagö niha.
BÖI BALI’Ö UMBU ZINURAU ZI SO BA WIKIPEDIA! Da’a lala saösö na omasi’ö manura ba ensiklopedia sebua si so ba gu’ö, sambua lala nifalua moroi ba tim Pendidikan ba wame’e fanema li ba wanofu soya nifa’ema niha sato.
Tim Pendidikan manötöna wa Buku Fanolo sadogo-dogo andre, tola mame’e fangi’ila dane-dane (pengetahuan dasar) sifakhai ba Wikipedia khö ndra awöda misa sedöna mamörötaigö tobali kontributor ba Wikipedia.
Jakarta, 16 Maret 2020
Tim Program Pendidikan
Wikimedia Indonesia
