113
gila.....“
„Apa kaoe ada poenja soerat soerat, jang membri ketrangan tentang kaoe poenja diri ?“ Jefferson menanja.
„Akoe adalah istrinja ini Alfred Vieuxtemps. Akoe poenja nama Clotilde Vieuxtemps dan sabelonnja akoe kawin, namakoe gravin Limburgh. Itoe djahanam telah tjoeri soerat soera koe, soepaja akoe tida bisa membela dirikoe. Kemoedian ia tjoeri djoega anakkoe“....
Sampe di sini ia menangis.
Itoe dokter jang soeda biasa dengen tangisan sematjem itoe, tida merasa terharoe barang sedikit. Ia tjatet dalem boekoenja apa jang ia telah liat dan denger. Ia tjatet djoega jang paling oetamanja, jaitoe halnja toean Goud jang hartawan, memikoel ongkosnja Clotilde.
Vicky, itoe djoeroe rawat, sama tida merasa kasian seperti madjikannja.
Mendadak Clotilde djadi sabar poela dan dengen tjepat ia sapoe aer matanja. Kemoedian dengen sabar ia bitjara pada Jefferson: „Akoe maoe dibawa mengadep pada hakim. Akoe minta dibikin papreksaan. Tida bisa djadi kaoe brani mengoeasain akoe poenja diri, melaenken sebab itoe bangsat serahken akoe pada kaoe.“
„Kaoe moesti menaloek dan brenti memaki,“ djawab Jeferson sambil berdiri. „Djangan loepa, dimana kaoe berada dan akoe poenja kewadjiban boeat paksa kaoe menoroet prenta, kaloe kaoe tida maoe berlakoe sabar“
„Kaoe maoe apa dari akoe?“ Clotilde bertreak sebab tida bisa menahan sabar lebi lama. „Akoe moesti manda sadja orang koeroeng akoe di sini seperti orang gila ?..... Kombaliken kamerdikaankoe!
