114
... Pergi! Akoe moesti tjari. Akoe maoe minta kombali hak hakkoe!“
„Akoe tida bisa kombaliken kaoe poenja kamerdikaan sabelonnja kaoe djadi sabar.“
„Djangan paksa akoe sampe djadi mara betoel.“
„Kita di sini soeda taoe trima orang orang jang sakit lebih keras dari kaoe, orang orang gila jang lebi bikin riboet dari kaoe, tapi toch marika tida berajal boeat mengarti, bahoea paling baek bagi marika jalah; menaloek sadja.“
„Akoe nanti bertreak minta toeloeng,“ kata Clotilde sembari lari ka pintoe.
Ia telah boeka itoe pintoe sabelonnja Vicky dapet tempo boeat menjega. Ia lari ka pintoe depan, jang terboeka lebar boeat kasi masoek orang orang gila jang kombali dari djalan djalan di kebon.
Clotilde djalan sebrapa bisa tjepat meliwati itoe orang orang lelaki dan prempoean. Salah satoe antaranja djadi timboel gilanja Sasoeda ketawa, ia lantas menerdjang pada Clotilde, pegang dan seret ia ka pekarangan.
Itoe semoea terdjadi dalem satoe saat sadja.
Djoeroe djoeroe rawat mendjadi kakoe lantaran meliat itoe pertoendjoekan jang terkoenjoeng koenjoeng.
Sebagian dari itoe orang orang gila masoek ka dalem dan sebagian lagi kombali ka loear.
Kariboetan besar lantas terdjadi.
Orang denger treakan dalem roema dan di pekarangan. Itoe orang orang gila lantas djadi kepingin djoega boeat djadi merdika. Dan Clotilde mendjadi lantaran.
Djoeroe djoeroe rawat dengen soesa paja baroe bisa tangkep bebrapa orang antaranja. Vicky, jang
