129
Dengen moeka poetjet, napas sesak dan goemetar, Marie kloearken itoe koentji dari itoe latji dan kemoedian kombali di kamar soeaminja. Sasaat kemoedian ia soeda berdiri di depan medja toelis soeaminja.
Mendadak lampoe listrik dipademken. Sebagimana biasanja saben malem, boedjang bikin mati lampoe-lampoe listrik sabelonrja ia pergi tidoer. Dalem itoe kamar djadi gelap goelita. Marie djadi begitoe takoet dan goegoep, hingga ia sasaat lamanja seperti dipakoe di tempat ia berdiri. Begimana ini hal, jang terdjadi saben malem, sekarang bisa bikin ia djadi begitoe kaget?
Itoe baoe dara! Roepanja saben seconde itoe baoe djadi lebi keras.
Tapi Marie Smith ada saorang brani. la sigra djadi sabar kombali. Dengen menggrepe ia tjari pintoe. Ia taoe dalem ia poenja kamar tidoer ada satoe lampoe, jang saben malem dipasang oleh ia poenja pengoeroes kamar pada sabelonnja lampoe listrik dibikin mati.
Dengen tida soesa Marie dapetken itoe pintoe dan tatkala ia liat sinar terang dalem kamarnja, ia lantas menapas lega poela. la ambil itoe lampoe dan kombali ka medja toelis dari soeaminja.
Dalem antero roemah itoe ada sepi sekali. Tjoema boeni jang tertahan dari ia poenja tindakan atas tiker permadani ada kadengeran.
Ia taro itoe lampoe atas itoe medja toelis dan kemoedian boeka salah satoe latji jang paling bawah dari itoe medja. Tatkala itoe latji terboeka, Marie dapet liat satoe pak, kaen kotor. Ia kloearken itoe dari itoe latji. Dari mana datengnja itoe kemedja ? Ia boeka itoe boengkoesan dan berbareng dengen itoe satoe barang djato atas tiker.
